रामेछाप । उमाकुण्ड गाउँपालिकाको अन्तिम तथा उत्तरी अन्तिम मानव बस्ती रहेको लाहाछेवारको हिमालय आधारभूत विद्यालयमा अध्ययनरत बालबालिकालाई लक्षित गरी डे बोडर्सको संचालन गरिएको छ । गाउँपालिका तथा वडाको सहयोगमा विद्यार्थीहरूलाई विद्यालयमै बिहान ७ बजेदेखि बेलुका ५ बजेसम्म डे बोर्डसमा राखी अध्ययन अध्यापन गर्नका लागि यो कार्य माघ १ गतेबाट सुरु गरिएको गाउँपालिका उपाध्यक्ष तथा न्यायिक समितिका संयोजक श्री सावित्री सुनुवारले बताईन ।
उमाकुण्ड गाउँपालिका वडा १ नं। वडा अध्यक्ष तथा वडा शिक्षा समितिको संयोजक श्री ङावातिण्ड शेर्पाका अनुसार विद्यालयमा इन्टरनेट तथा विद्युत जडान गरि , कम्प्युटर, प्रिन्टर र बालबालिकालाई चिसोबाट बच्नकोलागी हिटरको समेत व्यवस्था गरिएको छ ।
विद्यालयमा अध्यन गर्ने सम्पुर्ण बालबालिकाहरुलाई निःशुल्क खानको व्यवस्था गाउँपालिकाले गरिएको विद्यालयका प्रधानाध्यापक पोटराज घिमिरे जानकारी दिए । विद्यालयमा बालमैत्री स्थानीय शासन कार्यान्वयन गर्ने घोषणा समेत गरिएको छ ।
विद्यालय ब्यवस्थापन समितिका अध्यक्ष ग्युर्मे शेर्पाको अध्यक्षतामा भएको कार्यक्रममा शिक्षा, युवा तथा खेलकुद शाखाका प्रमुख वासुदेव मश्राङ्गी, १ नं वडा अन्तर्गतका सम्पुर्ण विद्यालयका प्रधानाध्यापक, विव्यस तथा शिअसंका पदाधिकारी, शिक्षाप्रेमी, बुद्धिजीवी, अभिभावक लगायत विद्यार्थीहरूको उपस्थिति रहेको थियो । लाहाछेवार समुन्द्री सतहदेखि २७५० मिटरको उचाईमा रहेको छ ।
