रामेछाप । नवजागरण बचत तथा ऋण सहकारी संस्था लि., मन्थलीले आर्थिक वर्ष २०८१÷०८२ को वार्षिक कार्यक्रम अनुसार आफ्ना सदस्यहरूलाई वित्तीय शिक्षा दिने तथा उनीहरूबाट सल्लाह सुझाव लिने उद्देश्यले विशेष कार्यक्रम सम्पन्न गरेको छ। संस्थाले मङ्गलवार खाँडादेवी गाउँपालिका वडा नं. ४ र ५ को सान्ने, भिमसेनथान र सुफुरमान टोलमा सो कार्यक्रम सञ्चालन गरेको थियो ।
कार्यक्रममा संस्थाका पदाधिकारीहरू तथा सदस्यहरूको उत्साहजनक सहभागिता रहेको थियो। कार्यक्रममा सहकारीको हालसम्मका गतिविधिहरूको जानकारी प्रदान गर्दै वित्तीय व्यवस्थापन, बचतको महत्त्व, ऋण व्यवस्थापन, र सहकारी सिद्धान्तबारे प्रशिक्षण दिइएको थियो।
संस्थाका सदस्य शिक्षा उपसमितिका संयोजक भीमसेन थापाले कार्यक्रममा सहकारी संस्थाहरूले आर्थिक सशक्तीकरणमा खेल्ने भूमिकाबारे चर्चा गर्दै संस्थाका गतिविधिहरू थप प्रभावकारी बनाउन सदस्यहरूको सुझावलाई उच्च प्राथमिकता दिने बताए।
कार्यक्रममा सहभागी सदस्यहरूले सहकारीको सेवा प्रवाहलाई अझ प्रभावकारी बनाउन आवश्यक सुधारका उपायहरूबारे आफ्ना विचार तथा सुझाव प्रस्तुत गरे। वित्तीय साक्षरताको महत्वलाई आत्मसात् गर्दै नियमित रूपमा यस्ता कार्यक्रमहरू सञ्चालन गरिने संस्थाका सचिव नारायण बहादुर कार्कीले बताए।
नवजागरण बचत तथा ऋण सहकारी संस्था लि. मन्थलीले आगामी दिनहरूमा सदस्यहरूलाई लक्षित गरी विभिन्न वित्तीय शिक्षा कार्यक्रम सञ्चालन गर्ने योजना समेत अघि सारेको छ। चैत्र १४ गते लिखु तामाकोसी गाउँपालिका वडा नं. ६ तिल्पुङ र वडा नं. ७ खिम्तीमा, १५ गते वडा नं. ३ धोबीमा र १६ गते रामेछाप नगरपालिका वडा नं. ३ साँघुटारमा समेत सदस्य शिक्षा कार्यक्रम सञ्चालन गरिने संस्थाका व्यवस्थापक रमेश उदासले जानकारी दिए ।
सहकारी संस्थाका सदस्यहरूको वित्तीय साक्षरता अभिवृद्धि गर्ने उद्देश्यले आयोजित कार्यक्रममा सदस्य शिक्षा उपसमिति सदस्य बोधबहादुर रोका, हेमन्त पौडेल व्यबस्थापक रमेश उदाश र कर्मचारी टिका श्रेष्ठको सहभागिता रहेको थियो।
