बिना धितो ६६१ ले स्टार्टअप ऋण पाउने, रामेछापका ५ उद्यमी सिफारिस

बिना धितो २५ लाखसम्म ६६१ स्टार्टअप परियोजनाले ऋण पाउने
रामेछाप । स्टार्टअप उद्यम कर्जाका लागि ६ सय ६१ परियोजना छनोट भएका छन् । यस आर्थिक वर्षको औद्योगिक व्यवसाय विकास प्रतिष्ठानले स्टार्टअप उद्यम कर्जा सञ्चालन कार्यविधि २०८० अनुसार चालु आर्थिक वर्षका लागि ६६१ परियोजना स्टार्टअप कर्जाका लागि छनोट गरेको हो ।
अनलाइन र भौतिक रूपमा उपस्थितमा ५ हजार १५८ उद्यमीले दर्ता गरेका प्रस्ताव मध्येबाट १ हजार ३१४ उद्यमीले परियोजनाको प्रस्तुतीकरण गरेका थिए । यीमध्ये ६६१ वटा छनौट भएका हुन् ।
अब यी ६६१ परियोजनाले बिना धितो प्रति उद्यम अधिकतम् २५ लाख रुपैयाँसम्म कर्जा पाउने छन् ।
रामेछापका ५ उद्यमी स्टार्टअप कर्जाका लागि सिफारिस
रामेछापका ५ जना उद्यमीले स्टार्टअप कर्जा पाउने भएका छन् । ६ सय ६१ परियोजनालाई स्टार्टअप कर्जाका लागि सिफारिस गर्दा रामेछापका ५ उद्यम परियोजना परेको हो ।
मन्थली नगरपालिका–७ भटौलीको आसिका कृषि तथा पशुपन्छी फार्म, मन्थली नगरपालिका–१ को राम जानकी सोप एण्ड केमिकल्स कम्पनी प्रा.लि. र मन्थली नगरपालिका–१३ को कालिकादेवी कृषि तथा पशुपंक्षी फार्म कर्जाका लागि सिफारिसमा परेका छन् ।
त्यसै गरी रामेछाप नगरपालिका–७ सुकाजोरको मिलीजुली कृषि तथा पशुपंक्षी फार्म र गोकुलगंगा गाउँपालिका–४ बेतालीको बेताली एग्रीकल्चर वाइल्ड लाइफ एण्ड रिसर्च सेन्टर कर्जाका लागि सिफारिस भएका छन् ।
कर्जाका लागि छनोट भएका उद्यमीहरूले ४५ दिनभित्र तोकिएको बैङ्कको शाखा कार्यालयमा सम्पर्क गर्नुपर्ने हुन्छ । कुन उद्यमी कुन बैङ्कको कुन शाखामा जाने भन्ने सूचना आउँदो बिहीबारसम्म प्रकाशन गरिने प्रतिष्ठानले निकालेको सूचनामा उल्लेख छ ।
व्यवसाय दर्ता र नवीकरणको सक्कल प्रमाणपत्र, प्यान र भ्याट दर्ताको सक्कल, उद्यमीको नागरिकताको सक्कल, आर्थिक वर्ष २०८०÷८१ को कर चुक्ता प्रमाणपत्र, आधिकारिक व्यक्तिको पासपोर्ट साइजको फोटो, व्यवसायको छाप, परियोजना लिज र भाडामा सञ्चालनमा रहेको भए सम्झौताको प्रतिलिपि तथा व्यवसायको प्रकृतिअनुसार अन्य निकायबाट लिनुपर्ने अनुमति पत्र लिएर तोकिएको बैङ्क शाखामा जानुपर्नेछ । प्रतिष्ठानले उद्यमीलाई बिना धितो न्यूनतम पाँच लाखदेखि अधिकतम २५ लाख रुपैयाँसम्म कर्जा वितरण प्रदान गर्नेछ ।