रामेछाप । ‘हरियाली, शान्ति र सद्भाव’ का निम्ति एउटा सानो प्रयास पनि गहिरो अर्थ बोकेको हुन्छ। त्यसैको अनुपम उदाहरण बनेको छ मन्थली माध्यमिक विद्यालयको कम्पाउण्डमा सम्पन्न बुद्धचित्त रोपण कार्यक्रम।
डहु माध्यमिक विद्यालय रामेछापका प्रधानाध्यापक बलबहादुर तामाङ, सहायक प्रधानाध्यापक तथा विद्यार्थीहरूको टोलीले सप्रेम १०४ बोट बुद्धचित्तका बिरुवा मन्थली माविमा ल्याई स्वयम् रोप्ने कार्य सम्पन्न गरेका छन्। वातावरणीय सन्तुलन, शिक्षण संस्थाबीच सहकार्य र भावनात्मक एकता प्रवद्र्धन गर्ने उद्देश्यसहित यो कार्य सम्पन्न भएको हो।
बुद्धचित्तको बिरुवा केवल एक बोट मात्र होइन, यसले बोकेको छ शान्तिको गहिरो सन्देश। यस अवसरमा मन्थली माध्यमिक विद्यालयकाले डहु माविका शिक्षक–विद्यार्थीहरूको यो पहललाई उच्च कदरका साथ स्वागत गरे।
कार्यक्रमका विशेष अतिथि रहेका रामेछाप जिल्ला समन्वय समितिका उपप्रमुख प्रेमसागर थापाको समुपस्थितिमा मन्थली माविको तर्फबाट मायाको चिनो हस्तान्तरण गरिएको थियो। उपप्रमुख थापाले आफ्नो मन्तव्यमा यस्तो सानो प्रयासले भविष्यमा विद्यालयबीचको सहकार्य, वातावरणीय चेतना र विद्यार्थीको सामाजिक उत्तरदायित्व झन् सशक्त बन्ने बताए।
यो कार्यक्रमले डहु मावि र मन्थली माविबीचको सम्बन्धलाई सिर्जनात्मक मित्रता र व्यवहारिक शिक्षाको साझेदारीतर्फ डोहो¥याएको छ। यस्ता सहकार्यहरूबाट विद्यार्थीले पाठ्यपुस्तक बाहिरको शिक्षा, स्वयंस्फूर्त श्रम र प्रकृतिप्रतिको जिम्मेवारीसमेत सिक्ने अवसर पाउँछन्। मन्थली माविका प्रधानाध्यापक टंकप्रसाद दहालले भने, “डहु माविका शिक्षकमण्डल र विद्यार्थीहरूले देखाएको यो समर्पण हामी सबैका लागि उदाहरणीय छ। उनीहरूको हातबाट रोपिएका यी बिरुवाले हरियाली मात्र होइन, दिगो मित्रताको जरा पनि गाड्नेछन्।“
प्रत्येक बिरुवा भोलिका दिनमा छायाँ दिने रूखमात्र होइन, त्यसले बालबालिकाको मनमा पनि स्नेह, सौहार्द र सेवा भावनाको बीउ रोप्नेछ। यो कार्यक्रमले दुई विद्यालयका भौगोलिक दूरीलाई मात्र होइन, मनको दूरीलाई पनि चिर्दै एकताको नयाँ परिभाषा प्रस्तुत गरेको छ। यस्तो गतिविधिले भविष्यमा विद्यालयहरूबीच शिक्षा, संस्कार र सामुदायिक उत्तरदायित्वको सेतु निर्माण गर्ने विश्वास बढाएको छ।
