सिन्धुली । हरिहरपुरगढी गाउँपालिकाको आयोजनामा सञ्चालित एक महिनाको ब्यूटिसियन तालिम सोमबार सम्पन्न भएको छ।
आर्थिक विकास शाखाका प्रमुख सन्जित कार्कीको अध्यक्षता तथा गाउँपालिका अध्यक्ष बज्रध्वज वाइबाको प्रमुख आतिथ्यतामा आयोजित समापन कार्यक्रममा तालिमको समापन गरिएको हो।
कार्यक्रममा गाउँपालिकाका प्रमुख प्रशासकीय अधिकृत दिपेन्द्र कुमार पैकरा, शिक्षा शाखा प्रमुख रामेश्वर पुडासैनी, कमल आछामी, पूर्व वडा अध्यक्ष बालकृष्ण नेपाल तथा तालिम प्रशिक्षक सिता खड्काको उपस्थिति रहेको थियो।
गाउँपालिका अध्यक्ष वाइबाले तालिमले महिलाहरूलाई आत्मनिर्भर बनाउने र रोजगारी सिर्जना गर्ने विश्वास व्यक्त गरे। “बढ्दो सहरीकरणको सन्दर्भमा ब्यूटिसियनजस्ता सिपमूलक तालिमहरूले महिलाहरूलाई स्वरोजगारको बाटो खोलिदिनेछन्,” उनले भने, “सिकिएको सिपलाई व्यवहारमा उतार्नुपर्छ, गाउँपालिकाले आवश्यक सहयोग गर्न तयार छ।”
प्रमुख प्रशासकीय अधिकृत दिपेन्द्र कुमार पैकराले एक महिनाको तालिमले व्यवसाय सञ्चालनको सम्पूर्ण दक्षता दिन नसक्ने भन्दै आगामी आर्थिक वर्षमा थप व्यावसायिक तालिमको व्यवस्था गरिने जानकारी दिए।
कार्यक्रममा सहभागिता जनाएका प्रशिक्षार्थीहरूलाई प्रमाणपत्र प्रदान गरिएको थियो। कार्यक्रमको सहजीकरण उद्यम विकास सहजकर्ता राजन विकले गरेका थिए।
गाउँपालिकाको यो पहलले महिलाहरूलाई स्वरोजगारतर्फ उन्मुख गराउने अपेक्षा गरिएको छ।
