रामेछाप । करिब चार वर्षको तयारीपछि रामेछाप नगरपालिका अब औपचारिक रूपमा बालमैत्री स्थानीय सुशासनयुक्त पालिका बनेको छ। शनिबार बागमती प्रदेशका मुख्यमन्त्री इन्द्रबहादुर बानियाँले विशेष समारोहका बीच यो घोषणा गरेसँगै जिल्ला मात्र नभई प्रदेशकै स्तरमा पनि रामेछापले उदाहरण राखेको छ।
नेपालभर अहिले २८ वटा मात्र पालिका बालमैत्री स्थानीय शासनको सूचक पूरा गरेर मान्यता पाएका छन्। त्यसमध्ये रामेछाप नगरपालाक जिल्लाकै दोस्रो पालिका बनेको हो। यसअघि नगरपालिकाका सबै ९ वडा बालमैत्री घोषित भइसकेका थिए।
बाल संरक्षण, विकास, सहभागिता र संस्थागत विकासका ५१ वटै सूचक पूरा गर्नु मुख्य शर्त थियो। स्थानीय सरकार सञ्चालन ऐन–२०७४, कार्यान्वयन निर्देशिका–२०७८ र घोषणा कार्यविधि–२०७९ मा तोकिएका पाँच चरणका २६ तह पनि पूरा गर्नुपर्ने प्रावधान छ। यी सबै प्रक्रिया पुरा भएपछि मात्र नगरपालिकाले बालमैत्री उपाधि पाएको हो।
नगर प्रमुख लवश्री न्यौपानेका अनुसार, नीति २०७८ सालमै ल्याइए पनि २०७९ असोजबाट यसलाई सघन रूपमा कार्यान्वयन गरियो। हाल नगरपालिकामा १८ वर्षमुनिका १० हजार २४१ बालबालिका छन्, जसलाई लक्षित गर्दै कार्यक्रमहरू सञ्चालन भइरहेको उनले बताए।
कार्यक्रमका प्रमुख अतिथि तथा बागमती प्रदेशका मुख्यमन्त्री बानियाँले घोषणा सभामा बालविवाहमुक्त र बालश्रममुक्त नगर बनेको उपलब्धिलाई ऐतिहासिक ठहर गर्दै “अब चुनौती भनेको दिगोपनाको” रहेको टिप्पणी गरे। उनका अनुसार, घोषणापछि मात्र होइन, निरन्तर अनुगमन र जिम्मेवार कार्यान्वयनले मात्र यो उपाधि अर्थपूर्ण बन्नेछ।
कार्यक्रममा पूर्व ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ, प्रदेशका सामाजिक विकास मन्त्री कन्चनचन्द्र बादे र प्रदेश सांसद तारानारायण श्रेष्ठलगायतले समेत दिगोपनामा सबै पक्षको संलग्नता अपरिहार्य रहेको धारणा राखे।
समारोहमा बालबालिकाले प्रस्तुत गरेका नाटक र सांस्कृतिक कार्यक्रमले बालमैत्री नगरको घोषणालाई मात्र औपचारिकता होइन, समुदायकै सरोकारको विषय बनाइदिएको देखिन्थ्यो।
रामेछाप नगरपालिका बालमैत्री घोषणा
