सुत्केरी आमालाई पोषण र परामर्श

रामेछाप । जिल्लाको सुनापति गाउँपालिकाले स्थानीय नागरिकको स्वास्थ्य र सुरक्षालाई उच्च प्राथमिकतामा राख्दै ‘उपाध्यक्षसँग सुत्केरी भेटघाट’ नामक विशेष अभियानलाई प्रभावकारी रूपमा अगाडि बढाएको छ। कार्यक्रमको मुख्य उद्देश्य ग्रामीण भेगका महिलाहरूलाई घरमै असुरक्षित तरिकाले सुत्केरी हुने परम्परागत जोखिमबाट मुक्त गराई स्वास्थ्य संस्थामा आएर सुरक्षित मातृत्व सेवा लिन प्रोत्साहित गर्नु रहेको थियो। सो अवसरमा अस्पतालमा सुत्केरी भएका आमाहरूलाई भेटी उनीहरूको स्वास्थ्य अवस्थाबारे विस्तृत जानकारी लिइनुका साथै शिशु र आमा दुवैको स्वास्थ्यका लागि अत्यावश्यक मानिने विभिन्न पोषणयुक्त खाद्य सामग्री तथा कोसेलीहरू वितरण गरिएको थियो।
गाउँपालिकाका अध्यक्ष ठूलो कान्छा तामाङले सुनापति गाउँपालिकाले स्वास्थ्य क्षेत्रमा क्रान्तिकारी परिवर्तन ल्याउन खोजिरहेको बताए । उनले भने, “हाम्रो पालिकाभित्रका कुनै पनि आमाले चेतनाको अभाव वा आर्थिक कठिनाइका कारण घरको अँध्यारो कुनामा ज्यान जोखिममा राखेर बच्चा जन्माउनु नपरोस् भन्ने हाम्रो मुख्य ध्येय हो। हामी सुनापतिलाई ‘शून्य होम डेलिभरी’ अर्थात् शतप्रतिशत स्वास्थ्य संस्थामै सुत्केरी हुने पालिका बनाउने अभियानमा छौँ। यो कोसेली वितरण कार्यक्रम केवल एउटा उपहार मात्र नभई, राज्य र स्थानीय सरकार तपाईंहरूको सुखदुःखमा सँगै छ भन्ने दह्रो भरोसा पनि हो। नागरिकको जीवन रक्षाभन्दा ठूलो विकास अर्को हुन सक्दैन, त्यसैले हामीले स्वास्थ्य पूर्वाधार र यस्ता जनमुखी कार्यक्रममा लगानी बढाएका हौँ।“
गाउँपालिकाकी उपाध्यक्ष गीता बिष्टले सुत्केरी अवस्थामा महिलाहरूलाई विशेष स्याहार र मायाको खाँचो पर्ने कुरामा जोड दिईन् । उनले सुत्केरी आमाहरूसँग प्रत्यक्ष संवाद गर्दै भनिन्, “एक महिला र आमा हुनुको नाताले म सुत्केरी अवस्थामा भोग्नुपर्ने शारीरिक कष्ट र मानसिक तनावलाई नजिकबाट बुझ्दछु । तपाईंहरू एक्लो हुनुहुन्न, यो गाउँपालिका तपाईंको माइती जस्तै हो। हामीले प्रदान गरेको यो पोषणयुक्त सामग्रीले तपाईंको शरीरलाई पुनः शक्ति प्रदान गर्न र बच्चाको स्वास्थ्य राम्रो बनाउन मद्दत गर्नेछ। गाउँका हरेक दिदीबहिनीलाई म के आह्वान गर्दछु भने, गर्भावस्थादेखि नै नियमित जाँच गराउनुहोस् र सुत्केरी हुन अनिवार्य रूपमा अस्पताल आउनुहोस्, तपाईंहरूको सुरक्षाको जिम्मा हाम्रो हो।“
प्रशासनिक दृष्टिकोणबाट कार्यक्रमको व्यवस्थापन र यसको दीर्घकालीन प्रभावबारे चर्चा गर्दै प्रमुख प्रशासकीय अधिकृत सुरेश कुमार श्रेष्ठले यस्ता कार्यक्रमले सरकारी सेवाप्रति जनताको आकर्षण र विश्वास दुवै बढाएको उल्लेख गरे । उनले भने, “गाउँपालिकाको स्वीकृत वार्षिक नीति तथा कार्यक्रमलाई पूर्ण रूपमा कार्यान्वयन गर्ने सिलसिलामा हामीले यो ’उपाध्यक्षसँग सुत्केरी भेटघाट’ कार्यक्रमलाई प्राथमिकतामा राखेका छौँ। यसले मातृ–शिशु मृत्युदर घटाउन र पोषणको अवस्था सुधार्न प्राविधिक रूपमा पनि ठूलो सहयोग पु¥याउँछ। स्थानीय सरकारले आफ्ना नागरिकको घरदैलोमा पुगेर सेवा दिँदा सुशासनको वास्तविक अनुभूति हुन्छ। हामी आगामी दिनमा स्वास्थ्य सेवालाई अझ प्रविधिमैत्री र सहज बनाउँदै लैजाने योजनामा छौँ ताकि कसैले पनि सामान्य उपचारका लागि टाढा धाउनु नपरोस्।“
अस्पताल परिसरमा आयोजित उक्त कार्यक्रममा गाउँपालिकाका अन्य जनप्रतिनिधिहरू, स्वास्थ्यकर्मीहरू र स्थानीय समुदायको उल्लेखनीय उपस्थिति रहेको थियो। अस्पताल प्रशासनले यस्ता प्रोत्साहनमूलक कार्यक्रमले गर्दा पछिल्लो समय स्वास्थ्य संस्थामा सुत्केरी हुन आउने महिलाहरूको संख्यामा उत्साहजनक वृद्धि भएको जानकारी दिएको छ। कार्यक्रमको अन्त्यमा सुत्केरी आमाहरूले जनप्रतिनिधिहरू आफैँ अस्पतालको शय्यासम्म आएर स्वास्थ्य अवस्था सोध्ने र पोषण सामग्री वितरण गर्ने कार्यले आफूहरूलाई अत्यन्त खुसी र सम्मानित महसुस गराएको प्रतिक्रिया दिएका थिए।