अशोज ६
काठमाडौँ । नेपालका कम्युनिष्ट पार्टीका नेताहरुलाई आफ्ना अनुभवहरु सुनाउन र सुझाव दिन चिनियाँ कम्युनष्टि पार्टीका नेताहरु आज नेपाल आउन लागेका छन् ।
चीनका राष्ट्रपति सी जिनपिङकोे नेपाल भ्रमणको चर्चा भइरहेकै बेला चिनियाँ कम्युनिस्ट पार्टीको अन्तर्राष्ट्रिय समन्वय विभाग प्रमुख सोङ ताओलगायतको टोली आज दिउसो साढे १२ बजेतिर काठमाडौं आउने भएको हो ।
चिनियाँ टोली र नेकपाका नेताका बीचमा आज र भोली काठमाडौको पाँचतारे होटलमा अन्तरक्रिया हुने भएको छ । चीनको विकास, चिनियाँ कम्युनिस्ट पार्टीको वर्तमान अवस्था, महासचिव सी जिनपिङको अवधारणाबारे चिनियाँ नेताले अनुभव सुनाउने कार्यक्रम रहेको नेकपाले जनाएको छ ।
कार्यक्रममा नेकपा अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहालसहित झण्डै दुई सय केन्द्रीय नेता तथा बाम बुद्धिजिविहरु सहभागी हुने भएका छन् । चिनियाँ टोलीले राष्ट्रपति विद्यादेवी भण्डारी र प्रधानमन्त्री ओलीसँग वेग्लै भेटवार्ता पनि गर्ने बताइएको छ ।
चीनका राष्ट्रपति सी जिनपिङ असोज अन्तिम साता नेपाल भ्रमणमा आउने कार्यक्रम तय भइसकेपछि चिनियाँ नेताहरुको नेपाल भ्रमण बढेको छ । भारतीय प्रधानमन्त्री नरेन्द्र मोदीको निमन्त्रणामा २४ असोजमा भारत जान लाग्नुभएका सी त्यहाँको भ्रमण सकेर फर्कने क्रममा नेपाल आउने हुनुभएको हो । उहाँ एक रात काठमाडौं बसेर फर्किने कार्यतालिका रहेको परराष्ट्र मन्त्रालय श्रोतले जनाएको छ ।
चीनबाट राष्ट्रपतिस्तरको नेपाल भ्रमण २३ वर्षपछि हुन लागेको हो । सी नेपाल आउने तेस्रो चिनियाँ राष्ट्रपति हुनहुनेछ । चीनका तत्कालीन राष्ट्रपति जियाङ जमिनले १९ र २० मंसिर ०५३ मा नेपालको राजकीय भ्रमण गर्नुभएको थियो ।
