भगवती न्यौपाने,२५ मंसिर,
कपिलबस्तु—बाल श्रम र पूर्ण रुपमा कामदार मैत्री ईट्टा उद्योग संचालन गर्ने १२ वटा उद्योगका उद्यमीहरुलाई एक कार्यक्रमका बिच सम्मान गरिएको छ ।
कपिलवस्तु र रुपन्देहीमा रहेका उद्योगहरुमा श्रम व्यवस्थापन सम्वन्धी परियोजना संचालनमा आएपछि उद्योगहरु वालश्रम मुक्त र पूर्ण रुपमा कामदार मैत्री उद्योगका रुपमा आएका छन् ।
पूर्ण रुपमा कामदार मैत्री उद्योगका रुपमा संचालन भई रहेका ४ वटा उद्योगहरु र कामदार मैत्रीको रुपमा बालश्रममा वन्देज, ईच्छा विपरित श्रम नलगाउने, कामदारहरुको ज्यालामा पारदर्शिता, स्वास्थ्य तथा सुरक्षा सहित विभिन्न कामदारका मागहरुको संवोधन गरी पूर्ण रुपमा वालमैत्री उद्योगका रुपमा पुग्न गइ रहेका र हाल वालश्रम हटाईएका ८ वटा उद्योगका उद्यागीहरुलाई संम्मान गरिएको हो । उहाँहरुलाई ग्लोबल फेयरनेस ईनिसिएटिभको सहयोग, नेपाल गुडविभ फाउन्डेसन, घरघरमा शिक्षा तथा आत्मनिर्भर विकास संस्था नेपालको सहकार्यमा संचालित बेटर ब्रिक – नेपाल परियोजना मर्फत सम्मान गरेको थियो ।
बुटवलको नयाँ मिल स्थित लक्ष्मी होटलमा प्रदेश पाँचका उद्योग, पर्यटन, वन तथा वातावारण मन्त्रालयका मन्त्री लिला गिरीको हात बाट बेटर व्रिक नेपाल परियोजनाको ५ वटा मापदण्ड पुरा गर्ने ४ वटा ईट्टा उद्योगहरु रुपन्देहीको सिद्धार्थ ईट्टा उद्योग, कपिलस्तुहरुको संमृद्धि ईट्टा उद्योग, सेभेन स्टार ईट्टा उद्योग र एन.एस.एस ईट्टा उद्योगलाई सम्मानित गरिएको घरघरमा शिक्षा तथा आत्मनिर्भर विकास संस्था नेपालका कार्यक्रम संयोजन दुर्गा अर्यालले जनकारी दिनुभयो ।
त्यस्तै बाल श्रम मुक्त गर्न सफल ८ वटा कपिलबस्तु र रुपन्देहीका ईट्टा उद्योगलाई सम्मान गरिएको छ । बाल श्रम मुक्त गर्न सफल रुपन्देहीको सोना ईट्टा उद्योग, कपिलबस्तुहरुको हिमाल ईट्टा उद्योग, बुद्ध ईट्टा उद्योग, आर।सी। ईट्टा उद्योग, बौद्ध ईट्टा उद्योग, एपोलो ईट्टा उद्योग, लक्की ईट्टा उद्योग र जयसवाल ईट्टा उद्योगलाई पनि सम्मान गरिएको छ ।
कार्यक्रममा प्रदेश पाँचका उद्योग, पर्यटन, वन तथा वातावरणमन्त्री लिला गिरीले बाल श्रम न्युनिकरण गर्न स्पष्ट नीतिका साथ अगाडी बढ्नुपर्ने बताउँनुभयो । उहाँले मुलुकमा बाल श्रम उन्मुलन गर्न आर्थिक कुरा जोडिएको भन्दै बाल श्रम रहेका परिवारको आर्थिक श्रोतहरुलाई फराकिलो बनाउँन आवश्यक रहेको बताउँनुभयो । उहाँले अब श्रमिक र बालबालिकाहरुको हकहितको लागी काम गर्न आवश्यक रहेको बताउँदै नागरिकहरुको सुरक्षाको लागी जिम्मेवार भएर काम गर्न आफु सधै लाग्ने बताउनुभयो ।
त्यस्तै प्रदेश सभा सदस्य दधिराम न्यौपानेले बालश्रमलाई व्यवहारमै अन्त्य गर्नु जरुरी रहेको बताउँनुभयो । उहाँले बालश्रम मुक्त भनिए पनि अझै त्यस्ता उद्योगहरुमा बालबालिकालाई काममा लगाउने गरिएको भन्दै उनले कार्यान्वयनमा ध्यान दिन आग्रह गर्नुभयो । उहाँले श्रमिक र बालबालिकाको अधिकारको लागी भाषणमा भन्दा व्यवहारीकमा जानु आवश्यक रहेका बताउँदै बालबालिकाहरुलाई शिक्षाको पहुँच पु¥याउने परिवार मात्रैको जिम्मेबारी नभएर सरकारको पनि दायित्व रहेको जिकिर गर्नुभयो ।
त्यस्तै प्रदेश पाँचका सभा सदस्य पुष्पा चौधरीले हरेक क्षेत्रमा बालश्रम मुक्त अभियान चलाउन आवश्यक रहेको बताउँनु भयो । उहाँले बेटर व्रिक–नेपाल परियोजनाले उद्योगी र श्रमिकहरुलाई उत्तरदायी उत्पादन गर्न र बालश्रम मुक्त उद्योगलाई सम्मान गरि उदाहरणिय काम गरेको उल्लेख गर्नुभयो । उहाँले अब बाल श्रमलाई न्यूनिकरण गर्न मात्र होइन बालश्रम अन्त्य गर्न सबै सरकारी तथा गैर–सरकारी निकाय थप जिम्मेबारको साथ अगाडी वढ्न आवश्य रहेको बताउँनुभयो ।
यसै क्रममा ग्लोबल फेयरनेश ईनिसियटिभका राष्ट्रिय निर्देशक सुरेश पण्डितले उद्योगलाई बालश्रममुक्त एवं श्रमिक मैत्री बनाउन खोजेकोले राम्रो कार्य गर्नेलाई प्रोत्साहन गर्ने हेतुले यो सम्मान गरेको बताउँनुभयो । उहाँले ग्लोबल फेयरनेस ईनिसियटिभले नेपाल सरकार र स्थानीय साझेदार संस्थाहरु मार्फत ईटा उद्योगको समग्र रुपान्तरणमा काम गर्दै आएको बताउँदै उद्योगी र श्रमिकहरुलाई उत्तरदायी ईट्टा उत्पादनमा थप जिम्मेबारी बनाएको बताउँनुभयो ।
