पुष ०६
काठमाडौँ । सत्तारुढ दल नेपाल कम्युनिष्ट पार्टी (नेकपा) स्थायी कमिटीको बैठक आज सकिने भएको छ । अध्यक्षको प्रतिबेदनमाथि सहमति जुटाएर बैठक समापन गरिने भएको हो ।
अध्यक्षद्धय केपी शर्मा ओली र पुष्पकमल दाहाल ‘प्रचण्ड’द्वारा प्रस्तुत राजनीतिक प्रतिवेदन र महासचिव विष्णुप्रसाद पौडेलद्वारा प्रस्तुत विधान संशोधन प्रस्तावलाई सुझावसहित पारित गर्दै बैठक सकिने बताइएको छ ।
बैठकले केन्द्रीय कमिटीको बैठकको मिति पनि तय गर्ने नेता बेदुराम भुसालले जानकारी दिनुभयो ।
बैठकले विधान संशोधन गर्दै केन्द्रमा मात्र उपाध्यक्ष रहने र त्यसमा बामदेव गौतमलाई नियुक्त गर्ने निर्णय पनि गर्ने नेताहरुले बताएका छन् । सचिवालय विस्तार भने नहुने भएको छ ।
बैठकमा नेताहरुले सरकारको कामकारबाही प्रभावकारी नभएको, सिमा विवादलाई टुंग्याउन नसकेको, सरकार भ्रष्टाचारमा लिप्त भएको, पार्टी संचालन प्रभावकारी हुन नसकेको, एमसिसिका बारेमा गलत निर्णय भएको लगायतका विषयलाई प्राथमिकताका साथ उठाएका थिए ।
सवै नेताहरुले उठाएका विषयलाई अध्यक्ष प्रचण्डले हिजो जवाफ दिनुभएको थियो । अर्को अध्यक्ष तथा प्रधानमन्त्री ओली अस्वस्थताको कारण देखाउदै बैठकमा कुनै दिन पनि उपस्थीत हुनुभएको थिएन ।
तत्कालिन नेकपाका केही नेताहरु स्थायी कमिटीको बैठक नै छोडेर राष्ट्रपति कार्यालयमा राष्ट्रपतिसँग छलफलमा गएको भन्दै आलोचना भएकाले त्यसलाई थप चर्किन नदिन र एमसिसिको बारेमा थप विवाद हुन नदिन पनि बैठक आजै टुंग्याउने तयारीमा नेताहरु रहेको बताइएको छ ।
बैठकले एमसीसीका बारेमा कुनै निर्णय नगरी अध्ययनपछि निर्णय लिने र त्यसका लागि अध्ययन कार्यदल बनाउने निर्णय गर्ने एक नेताले जानकारी दिएका छन् ।
ढिलोमा तीन तीन महिनामा बस्नु पर्ने व्यवस्था भएको बैठक एक बर्षपछि बसेको हो । आजको बैठक बिहान ११ बजेपछि पार्टी केन्द्रीय कार्यालय धुम्बाराहीमा बस्ने प्रवक्ता नारायणकाजी श्रेष्ठले जानकारी दिनुभयो ।
