१९ माघ,
रामेछाप । नेपाली कांग्रेसले नेविसंघको तदर्थ समितिमा सात पदाधिकारी थपेको छ । राजीब ढुंगानाको अध्यक्षतामा बनेको समितिमा आइतबार दुई उपसभापति र पाँच महामन्त्री थपेको हो ।
उपसभापतिमा तुलसा पन्त र मुक्तिराज पौडेल चयन भएका छन् । महामन्त्रीमा दिपक भट्टराई, उर्मिला थपलिया, प्रभातकुमार दाहाल, बलदेव तिमल्सिना र युवराज पाण्डे चयन भएका छन् ।
काँग्रेसले बिहीबार एक विज्ञप्तिमार्फत अध्यक्षमा ढुंगानासहित दुई महामन्त्रीपनि चयन गरेको थियो । ढुंगानासँगै महामन्त्रीमा मनोज वैद्य र महेश्वरी कुँवर चयन भएका थिए ।
कांग्रेसको केन्द्रीय कार्यसमितिको २०७५ फाल्गुण १ गतेको बैठकको निर्णयअनुसार, नेपाली कांग्रेसको विधान २०१७ संशोधन सहितको धारा ४२ ,१०,च बमोजिम रिक्त हुन गएको नेपाली कांग्रेसको भ्रातृ संस्था “नेपाल विद्यार्थी संघ केन्द्रीय तदर्थ कार्यसमिति” को गठन पार्टी सभापति शेरबहादुर देउवाद्वारा देहाय बमोजिम गरेको नेपाली कांग्रेसका मुख्यसचिव कृष्ण प्रसाद पौडेलले जानकारी दिएका छन् ।
निवर्तमान अध्यक्ष नैनसिंह महरले राजीनामा दिएपछि लामो समय नेविसंघ नेतृत्वविहीन भएको थियो । नेविसंघमा लामो समयदेखि ३२ वर्षे उमेर हद लगाउने कि नलगाउने भनेर विवाद थियो ।
२०७५ असोज २१ गते बसेको काँग्रेस केन्द्रीय समिति बैठकले बहुमतका आधारमा ३२ वर्षे उमेरहदसहित नेविसंघको विधान पारित गरेको थियो ।
विधान पारित भइसकेर पनि तदर्थ समिति बनाउँदा ३२ माथिबाटै आउनुपर्ने केही नेताको अडान कायमै थियो ।
केही नेताहरुले भने ३२ वर्ष मुनिबाट तदर्थ समिति आउनुपर्ने अडान राखेतापनि पनि त्यसलाई लत्याउँदैं नेविसंघको तदर्थ समिति अध्यक्षमा पाँच दशक पुग्न लागेका ढुंगाना चयन भएका छन् ।
