१३ बैशाख ।
काठमाडौ।यतिखेर विश्वव्यापी महामारीको रुपमा फैलिरहेको कोरोना भाइरस र लकडाउनका कारण श्रमिकहरु ठुलो मारमा छन् । विशेषगरी अनौपचारिक र स्वरोजगार क्षेत्रमा कार्यरत श्रमिकहरुको अवस्था झनै दिनप्रतिदिन नाजुक बन्दै गईरहेको छ । यहि महामारी कै कारण नेपालमा पनि लकडाउन गरेको महिना दिन भन्दा बढि भईसकेको छ । लकडाउनले ज्यालादारी र स्वरोजगार श्रमिक अझ बढि प्रताडित रहेकोको ट्रेड युनियन कांग्रेसका अध्यक्ष पुष्कर आचार्यले बताउनु भयो । बिहान बेलुकी छाक टार्न कठिन भएका श्रमिकहरुको समस्यामा विभिन्न राहत र सहयोग गरि मलम बनिरहेको छ ट्रेड युनियन कांग्रेस । युनियनले विगत केहि दिनदेखी अनौपचारिक क्षेत्रमा कार्यरत श्रमिकहरुलाई विभिन्न ठाँउमा खाना खुवाउनकासाथै हिडेरै घर फर्किरहेकालाई यातायातको व्यवस्था समेत गरि रहेको हो ।
निरन्तर राहत वितरण गर्ने क्रममा हिजो मात्र करिब ५ सय २६ जनालाई निशुल्क खाना वितरण गरेको जानकारी ट्रेड युनियन कांग्रेसका उपाध्यक्ष तेजेन्द्रजंग कार्कीले जानकारी दिनु भयो । उहाँका अनुसार गोङ्गबु का २ सय जना रिक्सा ठेला र निर्माण श्रमिक, बागलुङका १००, सर्लाही,प्युठान र कैलालीका हिडेका २ सय २६ जनालाई कलङ्कीमा निशुल्क खानाको व्यवस्था गरेको हो । हिजोको उक्त राहत वितरण कार्यको समन्वय युनियनका उपाध्यक्ष तेजेन्द्रजंग कार्की,महासचिव योगेन्द्र कुवर,उपमहासचिव गणेश केसि,राधिका कुईकेल, कोषाध्यक्ष मोहन कुमार बस्नेत, स्वास्थ्यकर्मी संघका अध्यक्ष रामजी घिमिरे लगायतको उपस्थितिमा भएको थियो ।
