गजल १
न बगेरै किनाराको छाल भयो जीवन
रित्ता दिन र महिनाको साल भयो जीवन- न ठोक्किदै कति ठाउँमा लडेछु है म त
गतिहीन र शुन्यताको चाल भयो जीवन - उचाइमा त पुग्नै पर्ने रहरहरु थिए
जेलिएको माकुराझैँ जाल भयो जीवन - फुल्न खोजेँ पर्खालभित्र छोपिएछु कतै
बन्दी घरको कैदी जस्तै बेहाल भयो जीवन - बग्न खोजेँ सधैं सधैं एकान्तको बाटो
सङ्लो मनमै धमिलिने ताल भयो जीवन
गजल २
- कहिले वामको कुरा कहिले दामको कुरा
कहिले चल्छ यहाँ गोप्य खामको कुरा - छहारीमा बसेकाहरु जुरुक्क उठ्छन्
अचानक चल्छ अनि चर्को घामको कुरा - विकास उत्थान र प्रगतिको वास्ता छैन
सत्ता, शक्ति अनि आफ्नै नामको कुरा - जुट्ने, फुट्ने नगरी सबै मिले हुन्थ्यो नि
शान्ति, विकास र साझा कामको कुरा
गजल ३
- फुल्न जाने यहाँ सार हो जिन्दगी
भुल्न थाल्यो भने झार हो जिन्दगी - हुन्छ ढुङ्गो त पर्खालमा राखिँदा
कुँद्न जाने कलाकार हो जिन्दगी - पंक्षी झैँ खेल स्वच्छन्द आकाशमा
उड्न मानेन ता भार हो जिन्दगी - खेल मैदान यो रंगको नृत्य हो
नाच्न जानेन ता धार हो जिन्दगी - युद्ध सङ्केतका छन् हजारौँ ध्वनि
मौनतामै बसे हार हो जिन्दगी - बल्छ बत्ती उता जन्म जन्मान्तर
कर्म सञ्चारको तार हो जिन्दगी
गजल ४
- शान्त बस्तीमा पुग्ने रहर थियो
गाउँबाट केही टाढाको सहर थियो - तिमीले पठाएको पत्र खोलेर हेरेँ
शब्द समेटिएको त्यो जहर थियो - आँसु खसाल्दै हेरेँ त्यो तिम्रो पत्र
आरोप लगाएका अक्षरहरुको लहर थियो - पढेकै थिएँ तिम्रा हरेक पत्रहरु
यसपालि त धोका दिइछौ भन्ने ठहर थियो
