मनोहर ढुंगेलरामेछाप २९ जेष्ठ
रामेछाप ( रामेछाप जिल्लाको गाउँ गाउँमा कोरोनाको संक्रमण फैलने क्रम रोकिएको छैन । जिल्लाका अधिकांश ग्रामिण भेगमा अहिले संक्रमितहरुको संख्या बढ्दै जान थालेको छ । गाउँमा सक्रमितको संख्या अस्वभाविक रुपमा बढ्दै गएको भएपनि कोरोना परिक्षण भने घटाउँदै लगिएको छ । जिल्लाका धेरै जस्तो गाउँहरुमा अहिले कोरोनाको जस्तै लक्षण मिल्ने विरामीहरु प्रत्येक घरमा रहेका छन् ।
गाउँहरुमा संक्रमितको संख्या अस्वभाविक रुपमा बढ्दै गएको जिल्ला स्वास्थ्य कार्यालय रामेछापका अधिकृत भुवन थापाले बताए । स्वास्थ्य मापदण्डका विषयमा गाउँमा सर्तकता नहुँदा यस्तो अबस्था श्रृजना भएको पनि थापा बताउ छन् । जिल्लामा अहिले होम आइसोलेसनमा बस्नेहरुको पनि घरमा नै मृत्यु हुन थालेको छ ।
गाउँमा परिक्षण गरिएकाहरु मध्ये कतिपय गाउँमा ८० प्रतिशत सम्ममा पोजेटिभ देखिने गरेको स्वास्थ्य कार्यालयको तथ्याकंमा उल्लेख गरिएको छ । चार दिन अगाडि जिल्लाको सुनापति गाउँ पालिकाको १ सय १५ जनामा परिक्षण गर्दा ९८ जनामा पोजेटिभ देखिएको जिल्ला स्वास्थ्य कार्यालय रामेछापका प्रमुख जितेन्द्र कर्ण बताए । गाउँमा हुने विवाह, ब्रतवन्ध तथा अन्य सामाजिक काममा हुने जमघटहरुले संक्रमितहरुको संख्या ह्वात्तै बढेको दोरम्बा शैलुङ्ग गाउँपालिकाका अध्यक्ष कमान सिंह मोक्तानले जानकारी दिएका छन् । उहाँले अहिले गाउँका अधिकांश घरहरुमा कोरोनासंग मिल्दो जुल्दो लक्षण भएका विरामीहरु रहेको जानकारी दिएका छन् । पछिल्लो समय आफ्नो गाउँपालिका पनि कोरोनाको उच्च जोखिममा रहेको सुनापति गाउँपालिकाका उपाध्यक्ष गिता विष्टले बताइन् । तर खाँडादेवी गाउँपालिकामा भने कोरोना सन्क्रिमित घट्दो क्रममा रहेको छ । गाउँ गाउँमा सचेतना फैलाउदै अभियान नै चलाइएको खांडदेवी गाँउपालिकाका अध्यक्ष प्रेमबहादुर तमाङले जनकारी दिएका छन् । पालिका भित्रका नागरिकलाई समस्या पर्दा तत्काल निशुल्क एम्बुलेन्स सेवा उपलब्ध गराइेको पनि अध्यक्ष तमाङले बताए । खांदादेवी गाँउपलिकामा हाल सम्म ५ जनाको मृत्यु भईसकेको छ ।
यस अगाडि शहरी क्षेत्रमा बढी फैलिएको कोरोना संक्रमण अहिले गाउँ गाउँमा पुगेको छ । समुदाय स्तरसम्म कोरोेना फैलिएपछि स्थानीय सरकारलाई समेत कोरोना संक्रमण न्यूनिकरणका लागि हम्मे हम्मे परेको छ । संक्रमण रोक्नका लागि जिल्लामा विभिन्न सचेतना मुलक कार्यक्रम देखी निषेधाज्ञा सम्मको काम गरिएको रामेछापका प्रमुख जिल्ला अधिकारी गौलोचन सैंजुले बताए ।
रामेछाप जिल्लामा बैशाख ३ गतेपछि १ हजार ७ सय ८३ जना संक्रमित भएको मध्ये १ हजार ३ सय ८८ जना निको भएर घर गइसकेको जिल्ला स्वास्थ्य कार्यालय रामेछापले जनाएको छ । अहिले अस्पताल र घरमा गरी ३ सय ७९ जना र ८ जना आसियुमा सक्रिय संक्रमित रहेको जिल्ला स्वास्थ्य कार्यालयका अधिकृत भुवन थापाले जानकारी दिएका छन् । जिल्लामा अघिल्लो बर्ष जम्मा २ सय २४ जना मात्र संक्रमित भएका थिए । हाल सम्म रामेछापमा कोरोना संक्रमणबाट १६ जनाको ज्यान गैसकेको छ ।
