जेठ ११,
रामेछाप । मन्थली नगरपालिका वडा नं. १ थापाचोकमा किराना पसल संचालन गरि बस्ने युवा संजय वाग्लेलाई जिल्ला प्रहरी कार्यालय रामेछापले पक्राउ गरेको छ । जेठ १० गते उनले आफ्नो फेसबुक पेजमा भारतबाट ‘प्रहरीको सेटिङ्ग’ मा मानिसहरु रामेछाप ल्याइएको भन्ने जानकारी फोटो सहित् पोष्ट गरेका थिए ।
सोही पोष्टको बारेमा सोधपुछका लागि जिल्ला प्रहरी कार्यालयमा ल्याइएको कार्यालयका प्रमुख वसन्त पाठकले जनता भ्वाइसलाई जानकारी दिए । घटनाको बारेमा जानकारी दिँदै पाठकले भने, ‘उहाँको फेसबुक पोष्टमा प्रहरी विरुद्ध भ्रामक कुराहरु लेखेर पोष्ट गरेको पाइयो । त्यसैले उनलाई सोधपुछको लागि पक्राउ गरिएको हो ।’
‘साइबर क्राइम अन्र्तगतको मुद्धा चलाउन मिल्ने हो या होइन भन्ने विषयमा उहाँसँग कुराकानी भइरहेको छ । यदि आफूले गल्ती गरेको स्वीकार गरी माफी मागेको खण्डमा उनलाई छाड्न पनि सकिन्छ ।’ पाठकले भने ।
भारतको सीमावर्ती क्षेत्र कंचनपुरबाट उनीहरुलाई काठमाडौं हुँदै ल्याइएको हो । रामेछाप लगायत अन्य विभिन्न जिल्लाका नागरिकहरुलाई एम्बुलेन्स मार्फत ल्याइएको प्रहरी प्रमुख पाठक बताउँछन् ।
वाग्लेले आफ्नो फेसबुकमा लेखेको ‘प्ररहीको सेटिङ्ग’ भन्ने कुरालाई बढी महत्वका साथ रामेछाप प्रहरी प्रशासनले बुझेको अनुमान गर्न सकिन्छ ।
‘प्रहरीको सेटिङ्ग भनेको प्रहरी सम्पर्कबाट मानिसहरु ल्याइएको भन्ने बुझ्न सकिँदैन ?’ भन्ने जनता भ्वाइसको जिज्ञासामा पाठकले भने, ‘के कसो हो, सोधपुछ भइरहेको छ । बाँकी विवरण पछि आउला ।’
वाग्लेले आफ्नो फेसबुकमा राखेको उक्त सामग्री हाल हटाइसकेका छन् । फाइल फोटो
