जेठ १२, जनता भ्वाइस संवाददाता,
रामेछाप । लकडाउनको कारण कुखुरा व्यवसायीहरु समेत मारमा पर्ने गरेका छन् ।
कोरोना भाइरस कोभिड १९ को कारण देशमा लकडाउन भएका कारण खोरका खोर कुखुराहरु दाना खान नपाएर मर्ने अवस्थामा पुगेका हुन् । पि.आर पोल्ट्रिफर्म नामक फर्ममा लेयर्स प्रजातिका कुखुराहरु पालन गरिएको छ । रामेछाप जिल्ला रामेछाप नगरपालिका वडा नं. ८ बिटारमा पालन गरिएको कुखुरा फर्ममा दानाको अभावका कारण कुखुराहरु मर्ने स्थिति सिर्जना भएको संचालक प्रदीप कार्कीले बताएका छन् ।
जनता भ्वाइससँग कुराकानी गर्दै कार्कीले भने, ‘२० लाखको लगानी गरेर कुखुरा पालन गरें । अहिले आफूसँग भएका १ हजार भन्दा बढी कुखुराहरु दाना खान नपाएर मर्ने अवस्थामा पुगेका हुन् ।
ब्रोइलर कुखुरा सामान्यतया ४५ देखि ५० दिनको हाराहारीमा बेच्न सुरु हुन्छ । तर लेयर्स प्रजातिका कुखुराहरु भने कम्तिीमा पनि पालन सुरु गरेको २ वर्ष सम्म उत्पादन दिइ नै रहेको हुन्छ ।
अण्डाका लागि पालन गरिएका कुखुराहरु यतिबेला कार्कीले मासुको मूल्यमा बेच्नका लागि सार्वजनिक गरेका छन् । प्रतिगोटा कुखुरा ३ सय ५० हाराहारीमा बेच्नका लागि उनले आफ्ना कुखुराहरु सार्वजनिक गरेका हुन् ।
बजारमा लेयर्स प्रजातिका कुखुराहरु मासुजन्य पदार्थ खानका लागि स्वस्थकर नहुने भन्ने सनसनी रहेको भन्ने कुरालाई प्रतिवाद गर्दै कार्की भन्छन्, ‘हुनसक्छ अरुका लागि । तर हामीले कहिल्यै पनि हाम्रा कुखुराहरुलाई अनावश्यक भिटामिन र केमिकलहरु खुवाएका छैनौं । त्यसैले यी कुखुराहरु मासुका लागि पनि योग्य छन् ।’
कोरोना भाइरसको प्रभावको कारण गिर्दो अवस्थामा गएको कुखुरापालन व्यवसाय त झन धरापमै परेको छ । सम्भवित घाटा दुर्घटनामा पर्न बाट बच्नका लागि गर्नुपर्ने कुखुरा बिमा समेत कार्कीले गरेका छैनन् । ‘यत्रो व्यवसाय गरेपछि कुखुराको बिमा गर्नु पर्दैन त ?’ भन्ने जनता भ्वाईसको जिज्ञासामा कार्की भन्छन्, ‘त्यो त हो । बिमा गरेको भए हुन्थ्यो तर त्यो प्रक्रिया निकै झण्झटिलो छ । १० प्रतिशत भन्दा बढी कुखुरा मरेको अवस्थामा मात्रै आफ्नो कुखुराको बिमा दावी गर्न पाइन्छ । यहाँ त कुखुरा मरेका छैनन् मर्नेवाला मात्रै छन् ।’
कार्कीको पिडा जस्तै जिल्लाभित्र कुखुरा व्यवसाय गर्ने अन्य धेरै कृषकहरुको अवस्था यस्तै छ । यस्तो अवस्थामा कृषकका पीडालाई केही हदसम्म भएपनि मल्हम लगाउन सरकारले राहतको प्याकेज ल्याउनु पर्ने कार्की बताउँछन् ।
