रामेछापमा : क्वारेन्टिनमा १८० जना,३६१ शैयाको क्वारेन्टिन र ७४ शैयाको आइसोलेशन तयार

जेठ २४,

रामेछाप । रामेछाप जिल्लामा क्वारेन्टिनमा बस्नेको संख्या केही घटेको छ । शनिबार रामेछाप नगरपालिकाका ८ जनाको पीसीआर रिपोर्ट नेगेटिभ आएपछि डिस्चार्ज गरिएको हो । शुक्रबार जिल्लाका २ गाउँपालिकाहरु गोकुलगंगा र लिखुतामाकोशीमा एकै पटक १७ जनामा कोरोना पुष्टि भएको थियो ।

विभिन्न पालिकाहरुमा कोरोनाको जोखिम पश्चात तयार पारिएको क्वारेन्टिनमा अहिले १ सय ८० जना जिल्ला स्वास्थ्य कार्यालय रामेछापका प्रमुख जितेन्द्र कुमार कर्णले जानकारी दिए । यो संख्या बढ्ने आंकलन गरिएको छ ।

उनका अनुसार भारत लगाएतका विभिन्न ठाउँबाट आएका मानिसहरुलाई क्वारेन्टिनमा राखिएको हो । हाल मन्थली नगरमा सबैभन्दा धेरै ५२ जना र सबैभन्दा थोरै गोकुल गंगामा ५ जना क्वारेन्टिनमा छन् ।

कर्णका अनुसार जिल्लाभर १ सय २३ जना सामुदायिक क्वारेन्टिन र ५७ जना होम क्वारेन्टिनमा छन् । शुक्रबार संक्रमण पुष्टि भएका १७ जनासहित र क्वारेन्टिनमा रहेका सबैको स्वास्थ्य अवस्था पनि सामान्य छ । कोरोना संक्रमणको सम्भावित जोखिमतालाई मध्येनजर गरी जिल्लामा ७४ शैयाको आइसोलेशन कक्ष र ३ सय ६१ शैयाको क्वारेन्टिन कक्ष तत्कालको लागि तयार पारिएको छ । यो अझै अपुग रहेको बताएको छ ।