जेठ २५,
काठमाडौं । नेपाल विद्यार्थी संघले शनिबार साँझ काठमाडौंको माइतीघर मण्डलामा पश्चिम रुकुमको सोती घटनामा ज्यान गुमाएकाहरुको आत्मा शान्तिका लागी दीप प्रज्वलन गरेको छ ।
घटनाका दोषीलाई राज्यले नै उन्मुक्ति दिन खोजेको भन्दै यस्ता जघन्य अपरधिलाई कडा कारबाही माग गर्दै दीप प्रज्ज्वलन गरिएको नेविसंघ पुर्व केन्द्रिय सदस्य रत्नहरी ढुंगेलले जानकारी दिए ।
कार्यक्रममा नेपाली कांग्रेस जाजरकोटका नेता एवं संविधान सभा सदस्य राजीव बिक्रम शाह , नेविसंघ महामन्त्री युवराज पाण्डे, राष्ट्रिय दलित आयोगका पूर्व सदस्य मन्जित ताम्राकार, नेपाल दलित विद्यार्थी संघका राष्ट्रिय अध्यक्ष कमल बिक , नेताहरू धर्मदेव फुलारा, तपेन खड्का , सुवास पौडेल , सोमराज मल्ल लगायतको उपस्थिति रहेको ढुंगेलले बताए ।
नेता शाहले सरकार र नेकपा नेताहरुले यो घटनालाई तोडमोड गरि दोषीलाई उन्मुक्ति दिन खोजेको आरोप लगाउनुका साथै घटनामा संलग्न सबैलाई सजाय दिलाउन आफुँ सम्पूर्ण तवरले लाग्ने प्रतिबद्धता व्यक्त गरे ।
नेविसंघ महामन्त्री पाण्डेले घटनामा संलग्न जुनसुकै जाति, पार्टी, समुदायको भएपनि कानुनी कार्वाही हुनु पर्ने बताए । ‘कुनैपनि बहानामा अपराधीहरूले उन्मुक्ति पाउनु हुँदैन । यो घटना कानुन र मानव जातिकै बिरूद्धको अपराध हो । यस घटनालाई तोडमोड गर्ने र अपराधी जोगाउने दुष्कर्म नगर्न सत्ताधारी सबैलाई चेतावनी दिन चाहन्छौं उनले भने ।
राष्ट्रिय दलित आयोगका पुर्व सदस्य ताम्राकारले ” सरकारले पिडितलाई न्याय र पिडकलाई दण्ड दिएन भने न्यायको लागी अन्तर्राष्ट्रिय अदालत पनि पुग्न सकिन्छ ।” उनले भने ।
यस्तै नेपाल दलित विद्यार्थी संघका अध्यक्ष बिकले अब न्यायका लागि देशभरका ५२ लाख दलित उठ्नुपर्ने बेला आएको र यो घटना सिङ्गो मानवता माथिको प्रहारका रुपमा आफुँहरुले लिएको बताए ।
कार्यक्रम नेपाल विद्यार्थी संघका नेता दिपक ओझाको संयोजना सम्पन्न भएको थियो । फाइल फोटो
