जेठ २७,जनता भ्वाइस संवाददाता,
रामेछाप । युवाले चाहे के हुँदैन ? धर्ती फोड्न सक्छ । पहाड तोड्न सक्छ । संसार आफ्नो वशमा राख्न सक्छ । त्यसैले उसको रगत तातो छ । तातो रगतमा समाज परिवर्तनको हाइ पावर हुन्छ । त्यही सोच र शक्तिको फ्यूजनबाटै जन्मन्छ – समुन्नत समाज ।
रामेछापका सहयोगी मनहरुको कुरा यतिबेला यहाँहरुको सामु मैले उठाउँदै छु । यहाँहरुले दृष्यमा देखिरहनु भएको स्थान हो, रामेछाप नगरपालिका वडा नं. ८ बिटार ।
मन्थलीबाट थोरै किलोमिटरको पैदल या सवारी दूरीमा रहेको यो स्थान निकै वर्ष अघिदेखि नै वनभोजमा रमाउन चालहनेहरुको गन्तव्यको स्थल बन्ने गरेको छ । केही वर्ष अघिबाट नै तत्कालिन जिल्ला वन, हाल डिभिजन वन कार्यालयले यो स्थललाई पार्कको रुपमा विकास गर्ने गरेको भए पनि त्यो पुरा हुन सकेको थिएन । त्यही अधुरो सपनालाई पुरा गर्ने काममा रामेछापका सहयोगी मनहरु लागेको छ ।
रासम अर्थात् रामेछापका सहयोगी मनहरु मन्थलीका केही अगुवा युवाहरुको सत्रियतामा गठन भएको एउटा लुज फोरम हो । यो एउटा समूह हो, यहाँ न कुनै वाद् न कुनै विचार या न कुनै जात धर्मको नै विषयलाई पैरवि गर्ने गरिन्छ । रामेछापका सहयोगी मनहरु भित्र जो कोही पनि सेवाभावको व्यक्ति अटाउन सक्छ ।
कोरोना भाइरसका कारण मुलुक बन्दबन्दीमा गएको अवस्थामा रामेछापका धेरै खाद्यान्न अभावका पीडितहरुलाई यो समूहले खाद्यान्न लगायत अत्यावश्यक सामग्रीहरु उपलब्ध गराएको थियो । यो समूहलाई एकै शब्दमा कसरी बुझन् सकियो भने, जहाँ जसलाई जस्तो किसिमको सहयोगको आवश्यकता हुन्छ, त्यसका लागि यो समूह सहयोग जुटाएर बाँढ्नका लागि अगाडि बढ्ने गर्दछ ।
विगत केही वर्षदेखि सोचको रुपमा रहेको यो समूह कुनै एनजिओ या आइएनजीओ होइन । यो समूह संस्थाको रुपमा कही दर्ता भएको छैन र आगामी दिनमा कहीँ कतै नजोडिने प्रतिवद्धता व्यक्त गर्दछ । हाल रामेछाप नगरपालिकाको वडा नं. ८ बिटारमा यो समूह पार्क निर्माण गर्न लागिपरेको छ ।
विगत १० दिनदेखि अहोरात्र खटिएको यो समूहले यो स्थानमा विभिन्न कार्यहरु गरिसकेको छ । यो समूहले आफ्नो गक्ष र क्षमता अनुसार यो स्थानलाई सिगार्ने काममा लागिपरेको छ । हुन त यो जमिन नेपाल सरकारको स्वामित्वमा छ तर बाबियाखर्क सामुदायिक वनको रुपमा रहेकोले यसलाई सोही वनको अनुमतिमा यो कार्य भइरहेको छ ।
यहाँ रहेका विभिन्न रुखहरुको फेदमा रंग लगाइएको यहाँहरुले देखिरहनु भएको छ । यो पनि एउटा सुन्दरता नै हो । झन यहाँ रहेका ढुङ्गाहरुलाई घोटेर विभिन्न अमूर्त कलाकृतिहरु देख्दा जो कोहीको पनि मन लोभिन्छ । धुस्रेफुस्रे भएर कडा चट्टानलाई घोट्दै गरेका रामेछापका सहयोगी मन जयराम मानन्धर यो कार्य र यस कलालाई व्यक्तिले आफूलाई कल्पनाशीलतमा हराउनका लागि छोडिदिने बताउँछन् ।
मानन्धर मात्रै होइन, यो समूहका सबै मनहरु यस कार्यमा उस्तै खटिएर लागिपरेका छन् । कोही टायर रङ्ग्याउँदै छन् त कोही रुखका फेद । फेरि कोही पार्क सिगार्ने काममा आ आफ्ना काममा उस्तै व्यस्त छन् । पार्कमा भएका ढुङ्गाहरुलाई कुँदेर अमूर्त आकार दिने मध्येका अर्का रासम समूह सदस्य रुद्रकुमार श्रेष्ठ समेत मानन्धरको कुरामा सहमती जनाउँछन् ।
मन्थली वरपर बालबालिका, वयस्क र वृद्धवृद्धाहरु नै रमाउने तथा मन भुलाउने उचित स्थान छैन । जताततै धुलो र कोलाहाल भन्दा फरक कोही एकान्तमा रमाउनका लागि यो ठाउँ उचित गन्त्वय बनेको छ । यसै सम्बन्धमा रामेछाप सहयोगी मनहरुका अर्का सदस्य तथा सोही स्थानका कुखुरा पालक कृषक सुनिल रायमाझी आफूलाई यस कार्यका लागि अलग्गै उर्जा मिलेको बताउँछन् ।
राम्रो काम गर्नेलाई सबैले निस्वार्थ भएर सहयोग गछन् भने झैं रामेछापका सहयोगी मनहरुलाई बगमती प्रदेश युवा संजालको समेत कार्यगत सहयोग र समर्थन रहेको छ ।
पार्क निर्माण र व्यवस्थापन सम्बन्धमा बागमती प्रदेश युवा संजालका उपाध्यक्ष नवराज श्रेष्ठले यो पार्क निर्माण र व्यवस्थापनका लागि सबैलाई सहयोग गर्न आग्रह रहेको छ ।
बिटारमा रहेको यस पार्कलाई विशेषगरी मन्थलीका नागरिकहरुका लागि रिफ्रेस सेन्टरकै रुपमा बनाउन लागिएको रासम का अर्का जुझारु सदस्य विपिन भट्राईको बुझाई छ भने रामेछाप सहयोगी मनहरुको यस कार्यलाई स्थानीयले बडो रुचिपूर्ण मानेका छन् ।
आफ्नो घर छेउमा रहेको यो खाली जमिनलाई यस्तो सिगारपटार गरेपछि जो कोहीको पनि मन नरमाउने कुरै भएन । निस्वार्थ, निर्भय र लोकोपकारी भावले गरिएको यस कार्यले सर्वत्र प्रशंसा पाउने देखिन्छ । झन यस कार्यका लागि सहयोग गर्ने सम्पूर्ण सहयोगदाताहरुलाई रासमले धेरै धन्यवाद दिइसकेको छ । त्यस्तै ढुङ्गा काट्ने मेशिन र आवश्यक रंगहरु दिएर सहयोग गर्ने रामेछापको सु परिचिति शुभलक्ष्मी हार्डवेयरलाई हामी पनि प्रेमपूर्वक धन्यवाद दिन चाहन्छौं । यसरी बिना स्वार्थ युवाहरु सामाजिक कार्यमा लागिरहँदा गाउँ गाउँमा सिँहदरबार भनेर आलाप जप्ने स्थानीय सरकार कता छ कुन्नी ?
यस्तो सामाजिक कार्यका लागि पनि व्यवसायीहरुसँग हात फैलाउनु पर्ने अवस्था देख्दा हामीलाई त लाज लागेको अनुभव भयो, के तपाईँलाई त्यस्तो लागेन ? यहीँ अर्को प्रश्न जन्मिन्छ, नागरिकको आफ्नै भनिएको सरकार कहाँ के गर्दैछ ? आजको सन्दर्भमा रामेछाप सहयोगी मनलाई स्थानीय सरकारको स्तरबाट पनि सहयोग हुनुपर्ने देखिन्छ । file photo
