जेठ ३१,
डोटी । कला संस्कृति संरक्षण समूह डोटीले आर्थिक सहयोग गरेको छ । सेती अस्पतालमा उपचाररत योगेन्द्रबहादुर खड्काको उपचारार्थ थोरै भए पनि आर्थिक सहयोग जुटाएको हो । सो समूहसँग आबद्ध विभिन्न क्षेत्रमा रहेका व्यक्तिहरुबाट जुटाइएको उक्त पैसा संस्थाका सदस्य कर्णबहादुर बोगटीले अस्पतालमै गएर हस्तान्तरण गरेका छन् । वाटिकामा नयाँ फूल फुलाऔँ भन्ने आदर्श वाक्यका साथ वि.सं. २०६१ सालमा स्थापित यो संस्था कला संस्कृतिको क्षेत्रमा मात्र सीमित नरही सेवा, सहयोग र सामाजिक जागरणका क्षेत्रमा पनि उत्तिकै सरोकार राख्ने युवाहरुको सम्मिलनमा अघि बढेको हो ।
वर्तमानको विषम परिस्थितिमा सामाजिक उत्तरदायित्व अन्तर्गत कोरोना राहत कोषका लागि भनेर पैसा जम्मा गर्दै गरेको अवस्थामा आर्थिक स्थिति दयनीय रहेका खड्कालाई विभिन्न क्षेत्रबाट सहयोग जुटाइँदै गरेको र औषधोपचारमा धेरै खर्च लाग्ने भएका कारण समस्या रहेको कुरा जानकारीमा आएपछि सेवा र सहयोगस्वरुप व्यक्तिगत रुपमा जम्मा गरेको पैसा उनको उपचारमा केही मात्रामा भए पनि सहयोग पुगोस् भन्ने उद्देश्यले रु. १० हजार १ सय ५ रुपैया खड्कालाई प्रदान गरिएको छ ।
लोकराज पाठक, भोजराज ओझा र गाङ्गी बलायरको संयोजकत्वमा गठित आर्थिक सहयोग सङ्कलन समितिमा गणेशप्रसाद उपाध्याय, डिलबहादुर महरा, पदमराज उपाध्याय र कर्णबहादुर बोगटीबाट पैसा सङ्कलन भएको थियो । समूहमा तमाम क्रियाशील सदस्य तथा सहयोगी र शुभचिन्तकहरु भए पनि लकडाउनका कारण थोरै मात्र सहयोग जुट्न सकेको जानकारी यस समूहमार्फत् प्राप्त भएको छ ।
पैसा थोरै भए पनि हाम्रो यो कदमले सेवामूलक भावनाको सन्देश प्रसारण होओस् भन्ने हामी चाहन्छौँ, यो समूहको भनाइ रहेको छ । सेवा, सहयोग, सिर्जना र सकारात्मक चिन्तन बोकेको यो समूहले पुनर्जागरणको साथमा कदम बढाएको तथा सिर्जनात्मक यात्रामा क्रियाशील रहने उद्देश्यका साथ अघि बढ्न थालेको कुरा संस्थाका संस्थापक अध्यक्ष तीर्थराज जोशीले बताए ।
