असार २, जनता भ्वाइस संवाददाता, रामेछाप
देश यतिबेला कोरोनाको कहरमा चुर्लम्म डुबेको छ । नागरिकहरु त्राही त्राही छन् भने उनीहरुको खल्तीको गहिराई दिन दुगुना रात चौगुना भासिँदै छ । देशको २ नम्बर र कर्णली प्रदेशले विस्तारै कोरोनाको भरण पोषण गर्दैछ भनेर भन्दा सो प्रदेशका नागरिकहरुमाथि विल्कुलै अन्याय हुँदैन । भारत तथा तेस्रो मुलुककाट कोरोना संक्रमित भएर भित्रिएका नागरिकको कारण यो समस्या निम्तिएको हो ।
भन्न पनि पाप लाग्छ, घर नआउन त कहाँ जाउन् परदेशीहरु ? आफ्नै माटो र माताको याद बोकेर बाँचेका विचरा ती परदेशीहरु अदृष्य शक्तिले लखेट्दा घर सम्झेर आए । आउन त आए सँगसँगै लिएर आए घातक रोगको विउ पनि ।
यता सरकारले कोरोना संक्रमण रोकथामका लागि १० अर्ब सिध्याइ नै सक्यो । बालुवामा पानी खन्याएर बालुवा भिजाउन पल्केको वर्तमान ओली नेतृत्वको सरकारका स्वास्थ्य राज्यमन्त्रीको आज रामेछापको रवैया देख्दा १० अर्ब होइन दशौं अर्ब सकिएको हुनुपर्छ ।
यो आज जिल्ला प्रशासन कार्यालय रामेछापमा देखिएको दृष्य हो । नेपाल सरकारका स्वास्थ्य राज्यमन्त्री नवराज रावत आज रामेछाप आइपुगेका थिए । जिल्ला जिल्लाको कोरोना भाइरस रोकथाम, नियन्त्रण तथा सरकारको निर्देशनको पालना भए नभएको जाँचगर्दै हिँडेका मन्त्रीज्यू आफ्ना सपरिवार सहित् आइपुगेका हुन् । उनकी श्रीमती अझ सुकिला मुकिला किशोर माननीयका पुत्र बाबु मन्त्री भएको बेला देश दौडाहमा निस्किएका छन् ।
त्यति मात्रै कहाँ हो र किशोरी मन्त्रीज्यूकी पुत्री उनलाई पनि के मतलब ? आफ्ना बाबु जो मन्त्री बनेका छन्, मितको पालामा मितिनी नाच्छन् भन्ने नेपाली उखान जस्तै यी किशोरी पनि रामेछाप हेर्न आइपुगेकी हुन् ।
अन्य हामीले पनि पहिचान गर्न नसकिएका केही अनुहार मन्त्रीज्यूको हुक्का, झोला, धुपौरा, गम्छा, लबेदा र तुलवा बोक्नेहरु पनि सँगसँगै आएका छन् । उनीहरुलाई पनि बालै फरर भने झैं मन्त्रीज्यूको पछिपछि लाग्दाको रमाईलो तपाईंहामीले महसुस गर्न कहाँ पाएका छौं र ?
यहाँहरुलाई अझ प्रष्ट भनौ है ? यी मन्त्री रामेछापमा कोरोना भाइरस संक्रमणको अवस्था अवलोकन गर्न काभ्रेबाट आएका हुन् । मन्त्रीले भनेर मात्रै हामीले विश्वास गर्न सक्थ्यौं सक्दैनथ्यौं तर यहाँ विश्वास नगरी धरै छैन किनकी उनले साथमा नमोबुद्ध नगरपालिका काभ्रेका मेयरलाई पनि एउटै गाडीमा कोचेर ल्याएका छन् ।
अब प्रश्न उठ्छ दर्शकवृन्द, कोरोना भाइरस रोकथाम, नियन्त्रणको अनुगमन तथा निर्देशन दिन रामेछाप भित्रिएका मन्त्रीका लागि यो दलबल आवश्यक थियो ? अझ आफ्ना छोराछोरी र श्रीमती साथमै ल्याउनु कत्तिको आवश्यक थियो ।
यो फिरन्ते दलमा १० देखि १५ जना मान्छेहरु मन्त्रीका पछिपछि मिठो मसिनो खाएर डकार्नको लालसाले आइपुगेका हुन्, त्यो पनि सरकारी बजेटलाई दुरुपयोग गर्दै ।
सिधा प्रश्न गरौं न,
रामेछाप जिल्लाको कोरोना भाइरस रोकथाम, नियन्त्रणको अनुगमन गर्न तथा निर्देशन दिन नमोबुद्ध नगरपालिकाका मेयर चाहिन्थ्यो ?
मन्त्रीज्यूको निर्देशन रामेछाप जिल्लाका प्रमुख जिल्ला अधिकारीका लागि विशेष हो । साथमा अन्य सरोकारवाला जिल्लास्तरकै रहनुमा पनि कुनै आपत्ति हुँदैन । तर यो टोलीमा मन्त्रीका श्रीमती र छोराछोरीको के काम ?
जवाफ स्पष्टै छ । शक्ति र सत्ताको दुरुपयोग गर्न मन्त्रीज्यूहरुलाई कसैले सिकाउनु पर्दैन । सुर्खेतका नागरिकहरुले हिजो मतदान गरेर जिताएका स्वास्थ्य राज्यमन्त्री रावतलाई आफ्नै सुर्खेतेली जनताको त महत्व छैन झन आम पौने तीन करोड नेपालीको के मतलब ?
नागरिकले रगतको पसिना बगाएर तिरेको करले बनेको राष्ट्रिय बजेटको यो दुरुपयोग गर्न रोक्ने हिम्मत कसैको छ ? कस्सैको छैन ।
दर्शकवृन्द यो दुरुपयोग रोक्ने क्षमता कुनै पनि नेपालीहरुमा छैन किनभने यो देशमा स्वतन्त्र मान्छेको अत्यन्तै अभाव छ । जोजो छन् ती सबै कुनै न कुनै राजनैतिक पार्टीको कार्यकर्ता छन् । आफ्ना भगवान जस्ता नेताले गरेको गलत कामको पर्दाफास गर्न सक्नु भनेको आफूतिर सोझिएको दुनो फर्काउनु जस्तै हो । अनि कोही बोल्छ उहाँहरुको विरुद्धमा ?
त्यसो पनि होइन , उहाँहरुको विरुद्धमा बोल्ने नेपाली नागरिकहरु पनि छन्, यो देशमा । ति को हुन् थाहा छ यहाँहरुलाई ?
ती पनि कार्यकर्ता नै हुन् विपक्षी दलका । उनीहरुका नेताहरुले हिजो सत्तामा छँदा पदिय मर्यादाको दुरुपयोग गर्दा उनीहरु पनि चुप्चाप बसेकै हुन् । अनि भन्नुस् त राजनीतिको आडमा गरिने दब्दबा कहिल्यै हट्छ ?
कुनै पनि हालतमा हट्दै हट्दैन यो देशमा ।
अनि अर्को महत्वपूर्ण कुरा पनि छ
जिल्ला बाहिरबाट आउने नागरिकहरुप्रति रामेछापमा पनि उच्च सतर्कता अपनाइएको छ । यसरी आएका रामेछापली नागरिकहरुलाई सेलेघाट नाकाबाट भित्रिन दिइने गरेको छैन । जो आएपनि सेलेघाट क्वारेन्टिन उनीहरुका लागि बासस्थान बन्ने गरेको छ ।
हेर्नुस् है मन्त्री रावत, उनको परिवार र आसेपासेहरु विभिन्न जिल्लाको भ्रमण गरी मिठो मसिनो खाएर रामेछाप भित्रिएका छन् । स्वास्थ्य राज्यमन्त्री रावत कुनकुन जिल्लाको भ्रमण गरेर रामेछाप आइपुेका हुन्
मन्त्रीजस्ता भिआइपीहरुलाई जिल्ला प्रवेश गर्दा न कुनै चेकजाँच गरिएको छ न कुनै सुरक्षाको उच्च सतर्कता नै । सतर्कता अपनाइएको छ त मन्त्रीज्यूको अमूल्य जीवनको । त्यो पनि नागरिकहरुका सेना र प्रहरी परिचालन गरेर ।
इतिहासकै बलियो कम्युनिष्ट सरकारका मन्त्री, त्यो पनि केन्द्र सरकार नियन्त्रित स्वास्थ्य मन्त्रालयका मन्त्रीलाई कोरोनाको शंका गर्ने कुरा पनि त आएन । यो विषयमा सोच्नु पर्ने त जिल्ला प्रशासन कार्यालय रामेछापले हो । तर प्रमुख जिल्ला अधिकारी रुद्रादेवी शर्माज्यूले पनि यो विषयमा सोच्न पनि सक्नु भएन होला । झन जिल्ला प्रशासन कार्यालयको आदेश बिना बिचरा नेपाल प्रहरीले त मन्त्रीज्यूलाई कोरोना संक्रमण छ किन छैन भनेर सपनामा समेत कल्पना गर्न कहाँ सक्थ्यो र ?
सायद यही होला सानालाई ऐन र ठूलालाई चयन भनेको पनि ।
