जेठ ३, जनता भ्वाइस संवाददाता, रामेछाप
मन्थली नगरपालिका वडा नं. १४ का वडाध्यक्ष भरतसिँ वाइबाले आफूले चालु आर्थिक वर्षमा गरेका कामहरुको समीक्षा गरेका छन् । जनता भ्वाइसले जनप्रतिनिधिहरुको आफ्नो चालु आर्थिक वर्षको कार्यप्रगति समीक्षाका लागि गरेको कुराकानीमा वाइबाले आफ्नो यस वर्षको कार्यकाल सफल रहेको बताएका हुन् । आफूले आफ्नो चालु कार्यकाल बजेटका हिसाबमा आफ्नो वडामा कम रकम भएपनि त्यसको सदुपयोग गरी नागरिकहरुको ओठमा खुशी ल्याएको प्रतिक्रिया दिएका छन् ।
‘कोरोना भाइरसको अत्यपछि आफ्नो वडाका युवाहरुलाई स्वरोजगार बनाउने विषयमा यहाँको योजना के छ ?’ भन्ने जनताभ्वाइसको जिज्ञासामा वाइबाले भने, ‘हामी वडास्तरका जनप्रतिनिधिले त सपना देख्ने मात्रै हो । वडामा वर्षमा आएको ५०–६० लाख बजेटले वडाको हालको बजेटले एउटा टोलबासी मिलेर खाजा खाने हो भने त्यही पनि पुग्दैन । यति रकमले रोजगारी सिर्जना गर्छु भन्नु त कल्पना मात्रै हो । स्वरोजगारका लागि प्रदेश वा संघीय सरकारले नै पहल गर्नु पर्ने अवस्था छ । गाउँमा भएका बाँझा भूमिहरुलाई त्यहाँको अवस्थिति अनुसार तरकारी तथा अन्य खेतीहरुलाई प्रवर्धन गर्न सकियो भने राम्रो हुन्छ ।’
फुलासी प्राकृतिक तथा खेती, किसानीको लागि उपर्युक्त भूमि भएको वाइबाले बताएका छन् । उनी अगाडि भन्छन्, ‘म आफैंले पनि १ हजार ५ सय विरुवा सुन्तला रोपेको छु । वडाध्यक्ष भएपछि होइन, पहिलादेखि नै म लगायत मेरो वरपरका दाजुभाइहरुले फलफूल खेतीमा लागिरहनु भएको छ । २०५४ साल भन्दा अघिदेखि नै म कागती खेतीमा लागेको थिएँ ।’
राजनीतिमा निकै लचिलो हुनुपर्ने वाइबाले बताएका छन् । पार्टी तथा मतदाताहरुले जुन म्याण्डेड दिनुहुन्छ, सोही अनुसार आफूले गर्नुपर्ने धारणा वाइबाको छ ।
