असार ७, जनता भ्वाइस संवाददाता, रामेछाप
रामेछाप उद्योग वाणिज्य संघले लकडाउनका कारणले मारमा परेका रामेछाप जिल्लाभित्र संघमा आवद्धता राख्ने व्यवसायीहरुलाई विभिन्न शिर्षकमा छुट् गर्ने निर्णय गरेको छ ।
शनिवार संघको नियमित मासिक बैठकले यस्तो निर्णय गरेको महासचिव नवराज ढुङ्गेलले जनता भ्वाइसलाई जानकारी दिएका छन् । आगामी असार मसान्तसम्म संघमा आवद्ध भएका व्यवसायीहरुको सदस्यता नवीकरण गराएमा मात्र सोको लागि लाग्ने ५ सय रुपैयाँ र आफ्नो घरको भाडामा बस्ने व्यवसायीहरुलाई घरभाडामा २० प्रतिशत छुट् गर्ने निर्णय गरेको हो । हालका दिनसम्म रामेछाप उद्योग वाणिज्य संघको भवनमा व्यवसाय गरी बस्ने व्यवसायीहरुले उच्चतम १६ हजार रुपैयाँ भन्दा बढी भाडा तिर्ने गरेका छन् ।
उल्लेखित भाडा दरमा जम्मा २० प्रतिशत छुट हुनेछ । जसको हिसाव प्रतिशत हेर्दा ३ हजार २ सय छुट् हुनेछ ।
उता सरकारले चैत्र महिनाको भाडा कोही घरधनीहरुलाई नलिन भनेको छ । यतिसम्म कि चैत्र महिनाको भाडा कोही कसैले लिएमा कारबाही समेत गर्छु भनेको अवस्थामा रामेछाप उद्योग वाणिज्य संघले भने लकडाउनको ३ महिने समय अर्थात् चैत्र, बैशाख र जेठ महिनामा समेत जम्मा २० प्रतिशत छुट् दिएर व्यवसायीहरुलाई पन्छाएको हो ।
उल्लेखित मासिक भाडा रकमको २० प्रतिशतले हिसाब गर्ने हो भने जम्माजम्मी ३ महिनामा ९ हजार ६ सय रुपैयाँको छुट् हुने देखिन्छ । अझ अर्को रमाइलो कुरा के छ भने यो छुट् पनि असार मसान्तसम्म व्यवसायीहरुले भाडा बुझाए भने मात्र पाउनेछन् ।
यो निर्णयले रामेछाप उद्योग वाणिज्य संघका आम सदस्यहरुलाई ५ सय रुपैयाँको २० प्रतिशतले छुट् पाउँदा १ सय रुपैयाँ छुट् हुने देखियो । त्यो १ सय रुपैयाँको छुट् हुनु र नहुनुले कुनै खास महत्व नराख्ला किनकी लाखौं रकम व्यवसायको नाममा बजारमा छरेर बसेका व्यवसायीहरुलाई १ सय रुपैयाँ छुट् हुनु उत्साहजनक निर्णय होइन । तर ३ महिनादेखि जम्माजम्मी करिब १ हजार रुपैयाँको व्यापार गर्न नसकेका रामेछाप उद्योग वाणिज्य संघको भवनमा व्यापार गर्ने व्यवसायीहरुले अब असार मसान्तसम्म ३८ हजार ६ सय भन्दा बढी रकम कसरी जम्मा पार्ने ?
हुन त ३ हजार २ सय रुपैयाँ रकमको छुट् पनि कम त होइन तर ९ हजार ६ सय छुट् पाउनको लागि अब संघको भवनलाई भाडामा लिएका व्यवसायीहरुले कम्तिमा एकमुष्टमा ३५ हजार ४ सय रुपैयाँ भन्दा बढी रकम असार मसान्तसम्म बुझाउनु पर्नेछ ।
यस सम्बन्धमा रामेछाप उद्योग वाणिज्य संघका महासचिव नवराज ढुङ्गेल आफूहरुलाई सरकारले चैत्र महिनाको भाडा छुट् गर्ने भन्ने बारेमा थाहा नभएको र यस्तो कुनै पनि परिपत्र कार्यालयमा नआएकोले २० प्रतिशत छुट् मात्रै गरेको प्रतिक्रिया दिन्छन् । जनता भ्वाइससँग यस बारेमा प्रतिक्रिया दिँदै ढुङ्गेल भन्छन्, ‘हामीले घरभाडामा २० प्रतिशत छुट् दिएर बजारका अन्य घरधनीहरुलाई पनि देखाएका छौं । हाम्रो स्टाफ खर्च लगायत अन्य खर्च धान्नका लागि भएपनि चैत्र महिनाको भाडा छुट् गर्न सकिएन । औपचारिक निर्णय नभइसकेको अवस्थामा साउन महिनामा पनि छुट् रकम दिन सकिन्छ कि भन्ने लाग्छ ।’
नियमित मासिक बैठकले गरेको निर्णयलाई नै आधार मान्दा आगामी असार मसान्तसम्म मात्र ३ महिनाकै भाडा तिरेमात्र २० प्रतिशत छुट् पाइने छ । साउनमा असार सम्मको भाडा बुझाउने अवस्था आयो भने त्यो पनि पाइँदैन ।
रामेछाप उद्योग वाणिज्य संघको यो निर्णयले देवकोटा चोकमा महंगो भाडा तिरेर व्यवसाय गरिरहेका उसैका व्यवसायीहरुलाई दाँतमा ढुङ्गा लागेको छ । सरकारले भनेको कुरा रामेछाप उद्योग वाणिज्य संघलाई त जानकारी हुँदैन भने आम घरधनी, जो बैंकको ऋणको व्याज बुझाउन नसकेर फिटिफिटी परेको छ, उसले के बुझ्न सक्थ्यो र ? यस्तो निर्णयले चैत्र महिनाको घरभाडा छुट् हुन्छ कि भनेर आशामा बसेको व्यवसायीहरुको आशाको धागो चुँडिएको अवस्था छ । रामेछाप उद्योग वाणिज्य संघले कम्तिमा आफ्नो घरमा बस्ने व्यवसायीहरुलाई छुट् गरिदिएको भए अन्य घरधनीहरुलाई उसकै पहलकदमीमा एक महिनाको भाडा छुट् गराउन सहयोग मिल्ने देखिन्थ्यो । तर अब मन्थली बजारका अन्य घरधनीहरुले चैत्र महिनाको भाडा छुट् गर्ने छैनन् किनकी व्यवसायीहरुको छाता संगठनले समेत २० प्रतिशतको दायरा बनाइसकेको छ ।
संघले गरेको निर्णय अनुसार अब आज आइतबारको मितिदेखि जम्मा २५ दिन यो निर्णले काम गर्नेछ । यही २५ दिनमा व्यवसायीहरुले पसल खोलेर ३८ हजार ६ सय जम्मा पार्न असम्भव छ, किनकी आंशिक रुपमा मन्थली बजार खुले पनि जसका लागि पर्याप्त ग्राहक आउन सकेका छैनन् । झन उल्लेखित रकममा १६ हजार भन्दा बढी भाडा असार महिनाको पनि जोडिने नै भयो ।
महासचिव ढुङ्गेलको भनाई अनुसार जिल्लाका सबै पालिकाहरुमा आफ्ना व्यवसायीहरुलाई पालिकास्तरमा लाग्ने सम्पूर्ण करमा छुट् दिने व्यहोराको परिपत्र गर्ने समेत निर्णय भएको छ ।
