असार ८,
काठमाण्डौ । नेपालमा कोरोना भाइरस सङ्क्रमितको संख्या ९ हजार नाघिसकेको छ । स्वास्थ्य मन्त्रालयको पछिल्लो विवरण अनुसार कोरोना सङ्क्रमित ९ हजार २६ पुगेका छन् । अहिलेसम्म २३ जनाको ज्यान गएको पुष्टि भएको छ । नेपालमा कोरोना सङ्क्रमित दिनदिनै बढ्दै गएका छन् । हप्तामा ३ हजार २ सय ६६ जना सङ्क्रमित थपिएका छन् । गएको जेठ ३२ गतेसम्म ५ हजार ७ सय ६० जनामा सङ्क्रमण पुष्टि भएको थियो ।
असार १ गते ४ सय ५१ जना, २ गते ३ सय ८०, ३ गते ५ सय ८६, ४ गते ६ सय ७१, ५ गते ४ सय २६, ६ गते ३ सय ३१ र हिजो ४ सय २१ जना थपिएका हुन् ।
जेठ ३२ गते रुकुमपश्चिममा संक्रमण पुष्टि भएको थियो । त्यसपछि सङ्क्रमण नदेखिएका ३ जिल्लामा पनि सङ्क्रमण भेटिएको छ । मनाङ, मुस्ताङ र ओखलढुंगामा सङ्क्रमण देखिएको हो । मनाङमा कपिलवस्तुबाट गएका कर्मचारीमा सङ्क्रमण देखिएको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता विनोद बिन्दु शर्माले बताए ।
मुस्ताङमा ८३ वर्षका वृद्धमा शनिबार कोरोना सङ्क्रमण पुष्टि भएको हो । हिजो ओखलढुंगामा सङ्क्रमण भेटिएपछि ७६ जिल्लामा सङ्क्रमण भेटिएको पुष्टि भएको हो । ओखलढुंगाको लिखु गाउँपालिकाका २८ वर्षका युवामा कोरोना पुष्टि भएको स्वास्थ्य कार्यालय रुम्जाटारका प्रमुख सुमन तिवारीले बताए ।
तर स्वास्थ्य मन्त्रालयले ओखलढुंगामा सङ्क्रमण भेटिएको पुष्टि गर्न बाँकी छ । अब वाग्मती प्रदेशको रसुवामा मात्रै संक्रमण देखिएको छैन । कोरोनाबाट निको भएर डिस्चार्ज हुनेको संख्या १ हजार ७ सय ७२ छ । अब नेपालमा कोरोना संक्रमित हुन बाट एक जिल्ला मात्रै बाँकी रहेको छ ।
आज बिहान पनि थपिए संक्रमित
गण्डकी प्रदेशमा २० जना सङ्क्रमित थपिएका छन् । दुई महिलासहित १९ पुरुष थपिएका हुन् । यो सँगै गण्डकीमा सङ्क्रमितको संख्या ५४० पुगेको छ । नयाँ थपिनेमा स्याङ्जाका १२ जना र नवलपरासी पूूर्वका ८ जना रहेका छन् ।
स्याङ्जाको अर्जुनचौपारीका ७ वर्षका ३ बालक सहित १६, ३०, ३१, ३० र ३८ वर्षका पुरुष र ६ वर्षकी बालिका सहित ५० वर्षकी एक महिला रहेकी छन् । त्यस्तै कालीगण्डकी गाउँपालिकाका १४ र ४८ वर्षका पुरुष रहेका छन् ।
यस्तै नवलपरासी पूर्वका बौदीकाली गाउँपालिकाका ८ जना पुरुष रहेका छन् ।
उनीहरु सबै भारतबाट आई क्वरेण्टीनमा बसिररहेका प्रदेश स्वास्थ्य निर्देशनालय पोखराका निर्देशक डाक्टर बिनोदबिन्दु शर्माले जानकारी दिनुभयो ।
गण्डकी प्रदेशका ५४० जना सङ्क्रमितमध्ये ५५ जना निको भएर घर फर्किएका छन् ।
file Photo
