रामेछाप । दोरम्बा गाउँपालिकाको आर्थिक वर्ष २०७७–०७८ वार्षिक नीति तथा कार्यक्रम मंगलवार सार्वजनिक गरिएको छ । सो गाउँपालिकाको कार्यालय, टोकरपुरमा सार्वजनि भएको उक्त नीति तथा कार्यक्रमहरु गाउँसभालाई सम्बोधन गर्दै सो पालिकाका अध्यक्ष कमानसिँ तामाङ्ले प्रस्तुत गरेका हुन् । प्रस्तुत नीति तथा कार्यक्रममा मुख्यतया ६ वटा नीतिहरुलाई दोरम्बा गाउँपालिकाले आगामी आर्थिक वर्षका लागि आफ्नो मुख्य एजेण्डा बनाएको छ । आर्थिक विकास, सामाजिक विकास, पूर्वाधार विकास, वन, वातारण तथा विपद् व्यवस्थापन, संस्थागत विकास र वित्तिय व्यवस्थापन तथा सुशासन नीति गरी जम्मा ६ वटा नीतिहरुलाई सार्वजनिक गरिएको हो । आगामी आर्थिक वर्षको लागि गाउँपालिकाले तर्जुमा गरिएको नीतिहरु केही सामान्य छन् भने कही नीतिहरु कोरोना भाइरस (कोभिड १९) का कारण लागु गर्नमा समस्या हुने देखिएकोले महत्वकाँक्षी समेत रहेका छन् । आर्थिक विकास नीति अन्र्तगत गाउँपालिकाले ३ वटा भिन्न विषयहरुलाई जोड दिएको छ । जसमा कृषि तथा पर्यटन, उद्योग तथा सहकारी र पशुसेवालाई गाउँपालिकाले विशेष जोड दिएको हो ।
कृषि तथा पर्यटनका प्रवर्धनका लागि गाउँपालिकाले विभिन्न १७ वटा योजनाहरुलाई अगाडि सारेको छ । स्थानीय स्तरमा उत्पादन हुने विभिन्न अन्न तथा फलफूलहरुको लागि गाउँपालिका निकै लचक देखिएको छ । सामुहिक खेती प्रणालीलाई गाउँपालिकाले विशेष महत्व दिएकोले गाउँस्तरमा भएका युवालक्षित कृषि प्रणाली मार्फत विभिन्न सीपमूलक तालिम समेत गाउँपालिकाले प्रदान गरी आयस्तरको वृद्धिगर्ने योजना बनाएको छ । त्यस्तै उद्योग तथा सहकारीको क्षेत्रमा पनि गाउँपालिकाले ८ वटा योजनाहरु सार्वजनिक गरेको छ । जुनसुकै गैरसरकारी संस्थाबाट प्रदान गरिने सबै प्रकारका सहयोगलाई गाउँपालिकाले एकद्वार प्रणालीबाट लागु गर्न स्वीकृति दिने समेत बताएको छ । पशुसेवाका क्षेत्रमा विभिन्न ७ वटा योजना निर्माण गरेका गाउँपालिकाले कृषकहरुलाई पशुपालनमा आकर्षित गर्न नश्ल सुधारको नीतिलाई अगाडि सारेको देखिन्छ । सामाजिक विकास नीतिभित्र शिक्षा, युवा तथा खेलकुद, स्वास्थ्य तथा सरसफाई र महिला बालबालिका युवा तथा जेष्ठ नागरिकहरु प्रति लक्षित कार्यक्रम गाउँपालिकाले बनाएको छ ।
शिक्षा युवा तथा खेलकुद भित्र पालिकाले विभिन्न ३४ वटा योजनाहरु अघि सार्दै एक विद्यालय एक नर्स कार्यक्रमलाई हरेक विद्यालयमा प्रभावकारी ढंगले लैजाँदै विद्यालयका बालकालिकाहरुको सरसफाइमा प्रथमिकता दिने जनाएको छ । वर्तमान समायमा कोभिढ १९ प्रति सबै वडास्तरमा ऐक्यवद्धता गर्न समेत गाउँपालिकाले आह्वान गरेको छ । जातीय छुवाछुत मुक्त गर्न समाजमा जनचेतना विस्तर गर्ने र महिला तथा जेष्ठ नागरिकहरुलाई निःशुल्क स्वास्थ्य शिविर संचालन गर्न समेत गाउँपालिका तत्पर देखिएको छ । पूर्वाधार नीतिका लागि अझै पनि गाउँपालिका सडक निर्माण र व्यवस्थापनको कार्यमा नै लागेको छ भने पालिका स्तरका विभिन्न आवश्यकीय स्थानमा भवन निर्माण गरी कार्यसंचालन गरिने गाउँपालिकाले बताएको छ । आफ्नो पालिका स्तरमा भएका बहुमूल्य जडिबुटीहरुको प्रशोधन संकलन कार्यलाई अगाडि बढाउने बताउँदै पालिकाले वडास्रतबाट प्रवाह गरिने नागरिकहरुप्रतिका सेवालाई चुस्त दुरुस्त बनाउने पालिकाको सोच रहेको छ । गाउँपालिकाले गर्ने गराउने कार्यक्रममा पेश्की दिने कार्य विगतको जस्तै आगामी वर्ष पनि पूर्ण रुपमा पालिकाले बन्देज लगाउने छ ।
वडास्तरको अभिलेख प्रणालीलाई व्यवस्थापन गर्न वडा कार्यालयका कर्मचारीहरुलाई तालिमको व्यवस्था गर्ने गाउँपालिकाको नीति तथा कार्यक्रममा उल्लेख छ । मंगलबार प्रस्तुत नीति तथा कार्यक्रम प्रति आफू उत्साहित रहेको सो गाउँपालिकाका प्रमुख प्रशासकीय अधिकृत दीपेन्द्र रेग्मीले प्रतिक्रिया दिएका छन् । ‘विगतमा नीति तथा कार्यत्रम अनुसार अगाडि बढ्न विभिन्न कारकतत्वहरु हावी भएकोमा यो वर्ष त्यस्तो नहुने विश्वास रहेको छ । यो नीति तथा कार्यक्रमलाई पूर्ण रुपमा सफल बनाउन सबै तह र तप्काको बिनास्वार्थ सहयोग रहनेमा मलाई विश्वास छ ।’ रेग्मी बताउँछन् ।
