असार ११, जनता भ्वाइस संवाददाता, रामोछाप
मेरो गाउँ मै बनाउँछु, बाँझो बारी मै फुटाउँछु भन्ने मूल नाराका साथ खाँडादेवी गाउँपालिकाले आर्थिक वर्ष २०७७–०७८ को नीति तथा कार्यक्रम सार्वजनिक गरेको छ । बुधबार सार्वजनिक भएको उक्त नीति तथा कार्यक्रम गाउँपालिका कार्यालय माकादुमको सभाहलमा सार्वजनिक भएको हो । उद्यमशिलता र सक्षमताको विकास गर्दै दीगो र समतामूलक आर्थिक विकास भएको वार्षिक नीति तथा कार्यक्रम बनाइएको खाँडादेवी गाउँपालिकाले जानकारी दिएको छ ।
प्रस्तुत नीति तथा कार्यक्रम भित्र गाउँपालिका भित्रका मुख्य कृषि योग्य जमिनहरुमा सम्भाव्यताका आधारमा सानो सिंचाइ, कुलो, लिफ्ट, थोपा सिंचाइ, सिंचाइ पोखरी, प्लाष्टिक पोखरी आदिको निर्माण तथा मर्मत गरी सिंचाइ सुविधा प्रवाह गरिने कुरा मुख्य रुपमा उल्लेख गरिएको छ । जसका लागि भटौली खोलाको शिर चोप्राङ्ग खोलामा बाँध निर्माण गरी सुख्खा क्षेत्र खाँडादेवी पकरवास सिंचाइ योजनालाई डि.पि.आर. गर्न आवश्यक पूँजीको व्यवस्था गरिने योजनामा उल्लेख गरिएको छ ।
यस वर्षको सघन अवस्थालाई आत्मसाथ गर्दै खाँडादेवी गाउँपालिकाले स्वदेशमा नै युवा लक्षित रोजगारीको अवसर सिर्जना गरी युवा जनशक्तिको विदेश पलायन हुने वास्तविकतालार्य रोक्ने, विदेशबाट कृषि सम्बन्धी ज्ञान, सीप र पुँजी सहति फर्केका युवाहहरुलाई व्यवसायिक कृषि पेशामा आवद्ध गर्नतर्फ वृहत्तर कार्यक्रम लागु बनाइएको गाउँपालिकाका अध्यक्ष प्रेमबहादुर तामाङले जनता भ्वाइसलाई जानकारी दिएका छन् । व्यवसायिक र समुहिक कृषि कर्म गर्न चाहने युवाहरुको लगत खडा गरी उनीहरुलाई अनुदानको व्यवस्था गरिने गाउँपालिका श्रोतले बताएको छ ।
गाउँपालिकाले भूमिबैंक स्थापना गरी स्थानीय तहसँगको समन्वयमा आवश्यक पर्नेलाई जग्गा तथा त्यसका लागि ऋणको व्यवस्था गरिने समेत आगमी वर्षको नीति तथा कार्यक्रममा उल्लेख गरिएको छ ।
