असार १४, जनता भ्वाइस सम्वाददाता, रामेछाप
आइतबार नेपालमा थप ४ सय ६३ जनामा कोरोना पुष्टि भएको छ । जसमा १ सय ५ जना महिला र ३ सय ५८ जना पुरुष रहेका छन् । देशभरी ४ सय ६३ जनामा कोरोना पुष्टि भएको स्वास्थ्य तथा जनसंख्या मन्त्रालको नियमित मिडिया ब्रिफ्रिङमा मन्त्रालयका प्रवाक्ता डाक्टर जागेश्वर गौतमले जानकारी दिएका छन् । यससँगै संक्रमितको सख्ंया १२ हजार ७ सय ७२ पुगेको छ ।
आइतबारको नियमित प्रेस ब्रिफिङमा स्वास्थ्य तथा जनसंख्या मन्त्रालयका प्रवक्ता डाक्टर जागेश्वर गौतमले मोरङ, झापा, उदयपुर, इलाम, सुनसरी, धनुषा, महोत्तरी, दार्जुला, गोरखा, खोटाङ, रौतहट, सर्लाही, सिन्धुपाल्चोक, गुल्मी, धादिङ, ललितपुर, बाजुरा, कास्की, नवलपुर, बागलुङ, सल्यान, लमजुङ, म्याग्दी, कपिलवस्तु, पाल्पा, प्युठान, दाङ, रोल्पा, रुकुम पश्चिम लगायतका जिल्लामा गरी थप ४ सय ६३ जनामा कोरोना संक्रमण पुष्टि भएको बताए ।
नेपालमा कोरोना भाइरस संक्रमणलाई जित्नेको संख्या ३ हजार नाघेको छ । बितेको २४ घण्टामा देशका विभिन्न अस्पतालबाट १ सय ७९ जना कोरोना संक्रमण बिरामी निको भएर घर फर्किएका छन् ।
पीसीआर विधिबाट पछिल्लो २४ घण्टामा ४ हजार ९ सय ६२ गरी आजसम्म २ लाख १५ हजार ८ सय ३९ जनाको कोरोना परीक्षण भएको छ ।
यस्तै आरडिटी विधिबाट पछिल्लो २४ घण्टामा २ हजार ७ सय ३२ गरी आजसम्म २ लाख ९६ हजार ७ सय ६६ जनाको परीक्षण भएको छ । आज देशभरीका विभिन्न क्वारेन्टिनमा ६१ हजार ७ सय ३१ जना रहेका छन् ।
यस्तै ९ हजार ७ सय ३१ जना विभिन्न अस्पतालका आइसोलेसनमा उपचार भइरहेको छ ।
