असार १५, जनता भ्वाइस संवाददाता, रामेछाप
‘धान उत्पादनमा वृद्धि आत्मनिर्भरता र संवृद्धि’ भन्ने मूल नाराका साथ सत्रौं राष्ट्रिय धान दिवस तथा रोपाइँ महोत्सव २०७७ मनाएको छ ।
मन्थली नगरपालिकाले १३ नं. वडा शाँखेमा रहेको एक कृषि सहकारीसँग समन्वय गरी यस वर्षको धान दिवस मनाएको हो । मन्थली नगरपालिकाका प्रमुख रमेशकुमार बस्नेत, उपप्रमुख मायाकुमारी कार्की, उपसचिव (प्राविधिक) हेमन्तकुमार बुढाथोकी लगायत अन्य कर्मचारीहरु सहभागी भएका थिए । त्यस्तै रोपाइँस्थल मन्थली नगरपालिका वडा नं. १३ शाँखेका स्थानीयबासीहरु करिब ७० जनाको सहभागीता रहेको थियो ।
बिहान ९ बजेबाट सुरु भएको रोपाइँ कार्यक्रम अघि दहिचिउरा खाने कार्यक्रम थियो भने दिउँसो १२ बजे सम्म उक्त रोपाइँ कार्यक्रम चलेको थियो । धान रोपाइँ कार्यक्रममा सहभागी मन्थली नगर कृषि शाखाका प्रमुख यौवन सुनुवारले कृषिकहरुलाई धान उत्पादन कार्यामा प्रोत्साहन गर्नका लागि यस्तो उत्सवको आयोजना गरिएको बताए ।
धान रोप्न नगरप्रमुख बस्नेत आफैं खेतमा ओर्लिएका थिए । साथै उपप्रमुख माया कार्की समेत उक्त कार्यक्रममा सहभागी भएकी थिइन् । राज्यले धान दिवस मनाउनका लागि नीति तथा कार्यक्रम नै बनाएको कारणले आफूहरुले आज धान दिवस मनाएको कार्कीले बताएकी छिन् ।
धानको बिउको माला लगाई खेतमा रोपाइँमा व्यस्त मन्थली नगरप्रमुख बस्नेतले नेपालीहरुको मूल पेशा कृषि भएको र सो कार्यका लागि आफूहरु कृषिलाई प्रवर्धन गर्ने र जमिन बाँझो नराख्ने अभियानमा लागेको उनले बताएका छन् ।
मन्थली नगरपालिकाका धेरै खेतीयोग्य भूमिहरु बाँझा छन् । यस्तो अवस्थामा मन्थली नगरपालिकाले बाँझा जमिनहरुमा पसिनाको सिँचाई गर्ने कार्यमा लाग्नुपर्ने आवश्यकता देखिएको छ ।
