तास खेलिरहेको अवस्थामा ७ जना पक्राउ

असार १७

कैलाली । कैलालीको लम्कीचुहा नगरपालिका-६ चोरीपुरबाट तास खेलिरहेका ७ जना पक्राउ परेका छन् । उनीहरुलाई सोही नगरपालिकाको खोलास्थित पुरानो कुखुराको खोरबाट जुवातास खेलिरहेको अवस्थामा २ लाख ५९ हजार ७ सय रुपैयाँ, तांसको गड्डी ३ थान, कम्मल २ थान र मोबाइल ८ थान सहित मंगलबार दिउँसो प्रहरीले पक्राउ जनाएको छ ।

पक्राउ पर्नेहरुमा लम्कीचुहा नगरपालिका-४ बस्नेहरु ४३ बर्षीय दिपक भण्डारी, २८ प्रकाश शाही, ३२ वर्षीय प्रजिन राई, ३४ वर्षीय कृष्ण बिष्ट, ४० वर्षीय नवल बुढा, सोही नगरपालिका-२ बस्ने ३९ वर्षीय नर बहादुर शाही र टिकापुर नगरपालिका-१ बस्ने ३० वर्षीय प्रकाश खड्का रहेका छन् ।

 सो ठाउँमा जुवातास खेलिरहेको भन्ने गोप्य सूचनाका आधारमा क्षेत्रीय अनुसन्धान समूह र ईलाका प्रहरी कार्यालय लम्कीबाट खटिएको प्रहरीले उनीहरुलाई पक्राउ गरेको हो । पक्राउ परेकाहरुमाथि प्रहरीले आवश्यक अनुसन्धान गरिरहेको छ । file Photo