असार २६ । जनता भ्वाइस संवाददाता, रामेछाप
सुरक्षित आप्रवासन परियोजना (सामी) रामेछापले बिहिबार १ दिने पत्रकार अन्तक्र्रिया कार्यक्रम सम्पन्न गरेको छ । जिल्ला स्थित विभिन्न संचार संस्थासँग आवद्ध भएका पत्रकारहरुलाई मन्थली नगरपालिकाको सभाहलमा भेला गरी सुरक्षित आप्रवासन सम्बन्धी १ दिने अन्तक्र्रिया आयोजना गरेको हो ।
उक्त पत्रकार अन्तक्र्रिया कार्यक्रममा सामीले आर्थिक वर्ष २०६७–०६८ देखि चालु आर्थिक वर्ष सम्म रामेछाप जिल्लाबाट विशेषगरी रोजगारी तथा अन्य कार्यको सिलसिलामा तेस्रो मुलुकमा जाने नागरिकहरुको तथ्याङ्क समेत सार्वजनिक गरेको छ ।
आर्थिक वर्ष २०६७–०६८ देखि हालसम्म आइपुग्दा आर्थिक वर्ष २०७१–०७२ मा जिल्लाबाट सबैभन्दा बढी नागरिकहरु विदेश गएको बताएको छ । उक्त आर्थिक वर्षमा हालसम्म ९ वर्षको तुलनामा सबैभन्दा बढी ६ हजार ६ सय ४२ जना जनशक्ति विदेश गएको जनाएको छ भने सोही ९ वर्षका अवधिको आर्थिक वर्ष २०६७–०६८ मा नै सबैभन्दा कम १ हजार ७ सय ९४ जना विदेश गएका छन् ।
चालु आर्थिक वर्षमा पुरुष र महिला दुवै वर्गका जनशक्ति सबैभन्दा बेसी विदेश पलायन भएको देखाइएको छ । चालु आर्थिक वर्षको अवस्थालाई हेर्ने हो भने पुरुष ३ हजार ५ सय ९० र महिला ७ सय ५५ जना विदेश गएका हुन् । यो तथ्याङ्क नै विगत ९ वर्षदेखिको बढी हो । साथै आर्थिक वर्ष २०६७–०६८ मा नै सबैभन्दा कम पुरुष १ हजार ७ सय ५० र ४४ जना महिला विदेश गएका थिए ।
यसरी सामीले उपलब्ध गराएको तथ्याङ्कलाई नियाल्दा हालसम्म रामेछाप जिल्लाबाट ३५ हजार ४ सय १५ पुरुष र ४ हजार ७ सय ७६ जना महिला गरि कूल ४० हजार १ सय ९१ जना रामेछापको युवा जनशक्ति विदेशिएको हो । सामीले यो तथ्याङ्क श्रम, रोजगार तथा सामाजिक सुरक्षा मन्त्रालयको तथ्याङ्कमा आधारित भएको जनाएको छ ।
सुरक्षित आप्रवासन परियोजना (सामी) वैदेशिक रोजगारलाई सुरक्षित, मर्यादित एवम् शोषण रहित बनाउन नेपाल सरकार र स्विटजरल्याण्ड सरकार बीच भएको द्विपक्षीय सम्झौता अनुरुप संचालित परियोजना हो । वैदेशिक रोजगारमा रहेका नेपाली कामदार र तिनका परिवार राज्य संयन्त्रबाट संरक्षित तथा गन्तव्य मूलुकमा मर्यादित कार्य वातावरणबाट लाभान्वित गराउने उद्देश्यका साथ यो परियोजना हालसम्म रामेछाप जिल्लाका विभिन्न स्थानीय तहहरुमा संचालनमा रहेको छ ।
यस परियोजनाले आफ्ना कार्यक्रम संचालन हुने ४ वटै स्थानीय तहहरू मन्थली नगरपालिका, सुनापति, दोरम्बा र उमाकुण्ड गाउँपालिकाले संयुक्त ब्यवस्थापनबाट परियोजनाका कार्यक्रम संचालन गरिरहेको जनाएको छ ।
हेल्भेटास नेपालले परियोजनाको गुणस्तर कायम गर्न र आवश्यक क्षमता विकासको लागि संघीय तथा स्थानीय तहमा प्राविधिक सहयोग गरिरहेको छ भने संघीय सरकारबाट प्रदेश र स्थानीयतहले बजेट सशर्त अनुदानको रुपमा प्राप्त गरेको छ ।
हिजो जिल्लास्थित पत्रकार अन्तक्रिर्या कार्यक्रममा मन्थली नगरपालिकाका प्रमुख रमेशकुमार बस्नेतले कार्यक्रमको उद्घाटन सत्रमा सुरक्षित आप्रवासन र यसको वर्तमान अवस्थाको बारेमा आप्mनो समग्र धारणा राखेका थिए ।
