असार २६ । जनता भ्वाइस संवाददाता, रामेछाप
जिल्लाको उमाकुण्ड गाउँपालिका वडा नं. २ थाप्रामा गएराती पहिरोका कारण २ वटा घर बगाएको छ भने ३ वटा घर विस्थापित भएका छन् । वि.सं. २०५९ सालमा अर्को थाप्रा गाउँबाट पहिरोकै कारण विस्थापित भएर आएका नागरिकहरुको घर यो पटकको पहिरोका कारण क्षति भएको जानकारी प्राप्त भएको छ ।
स्थानीय स्तरमा दुगड ग्रुपद्वारा संचालित जलविद्युत आयोजनाले सडक खनेको स्थानमा सडकको कारणले पहिरो गएको स्थानीयवासी विवश बस्नेतले जनता भ्वाइसलाई जानकारी दिएका छन् ।
२ वर्ष अघि आफूले संचालन गर्ने आयोजनाले स्थानीयस्तरमा कुनै पनि क्षति नपुर्याउने शर्तसहितको कागज गरेको भए पनि आयोजनाले निर्माण गरेको सडकका कारण पहिरो गएको हो । सो पहिरो जलविद्युत आयोजनाले अस्थायी रुपकोलागि सडक विस्तार गर्ने कार्यका कारण पहिरो गएको बताइएको छ ।
पहिरोका कारण उमाकुण्ड २ का स्थानीय ५ परिवार खुला आकाशमुनी आइपुगेका छन् । रामचन्द्र बस्नेतको परिवार संख्या ७, वेदबहादुर र खम्बध्वज बस्नेतको ५–५, ढालबहादुर बस्नेतको ९ र धनबहादुर श्रेष्ठको १ गरी कूल २७ जना विस्थापित भएका छन् ।
विस्थापित भएका परिवारका लागि उचित राहतको प्रबन्ध भएको उक्त वडाका वडाध्यक्ष खम्बध्वज बस्नेतले जानकारी दिएका छन् । बस्नेतले जनता भ्वाइससँगै कुरागर्दै भन्छन्, ‘हामीले वडास्तरबाट गर्नुपर्ने उचित राहतको व्यवस्था गरेका छौं । त्यो भन्दा पहिला उहाँहरुलाई स्थानान्तरण गरि सुरक्षित स्थानमा ल्याउने काम भइरहेको छ । उहाँहरुका लागि भण्डारमा २ घर खोजीसेकेका छौं ।
उहाँहरुका बस्तुभाउलाई के गर्ने भन्ने विषयमा सल्लाह हुँदैछ । क्षति पुर्याउने दुगड ग्रुपसँग यसको क्षतिपूर्तिका लागि पहल पालिका तथा वडास्तरबाट हुने कुरामा विश्वस्त रहन विस्थापितहरुलाई अनुरोध गर्दछु ।’ विस्थापित हुने खम्बध्वज बस्नेत र वडाध्यक्ष बस्नेत एउटै व्यक्ति भने होइनन् ।
