साउन २६, दोलखा । दोलखाको गौरीशंकर गाउँपालिकाको विभिन्न ठाउँमा बाढी र पहिरो चल्दा एक जनाको मृत्यु भएको छ भने दर्जन बढी घर बगाएको छ । गौरीशंकर गाउँपालिकाको वडा नम्बर ८ खारे टुइनटारमा गए राति पहिरो जाँदा एक जनाको मृत्यु भएको छ भने तीन जना घाइते भएका छन् । मृत्यु हुनेमा कालिञ्चोक गाउँपालिका ८ , सुनखानीका करिब २८ बर्षिय सुरेश शिवाकोटी रहेको स्थानीयले बताएका छन् ।
मृतक शिवाकोटी सिँगटीबाट टुनिटारको नव निर्मिति घरमा सटर राख्नको लागि बिहिबार गएका थिए भने काम नसकिएर सोही स्थानमा बसिरहेको अवस्थामा पहिरोले पुरेर मृत्यु भएको हो । बस्ती माथिबाट आएको पहिरोले मानवीय क्षति सहित बस्ती नै बगाएको हो । स्थानीय भुवन गुरुङका अनुसार कालिन्चोक गाउँपालिका ६ स्थित गुरुङफी बजारमा नजिकैको सुरी खोलाको बाढीले क्षति पुर्यएको छ ।
उनका अनुसार सुरी खोलाको बाढी बजारमा छिर्दा एक स्वास्थ्य चौकी सहित् दर्जन बढी घरमा क्षति पुयाएको छ । हिमाली क्षेत्रमा निरन्तरको झरी र खोलाहरु बढेसंगै आसपासको बस्ती समेत उच्च जोखिममा परेको हो । त्यसैगरी गौरीशंकर ७ मार्बुमा निर्माणाधिन घट्टेखोला आयोजना समते बाढीले क्षति पुर्याएको स्थानीय लाक्पा शेर्पाले जानकारी दिए ।
तल्लो खारेखोला जलविद्युत आयोजना र सिपिङ जलविद्युत आयोजनामा समेत खोलाले ठूलो क्षति पुर्याएको छ । गए राती सानासाना खोलामा बाढी आउँदा तामाकोसी नदीमा समेत खतराको संकेत देखाएको थियो । निरन्तरको वर्षासंगै चलेको पहिरो र बाढीका कारण गौरीशंकर गाउँपालिकाको मुख्य तथा ग्रामीण सडक ध्वस्त भएको छ । हाल चंखुको दोजे, बोथुर र मार्बुको गोंगटा उच्च रहेको स्थानीय भुवन गुरुङले बताएका छन् ।
