साउन २६, जनता भ्वाइस संवाददाता, रामेछाप ।
दोरम्बा गाउँपालिकाले कोरोना भाइरस (कोभिड १९) का कारण लामो समयदेखि रोकिएको शैक्षिक क्रियाकलाप यो सघन अवस्थामा पुनः संचालन नगर्न निर्देशन दिएको छ । एकाध विद्यालयहरुले छिट्फुट् रुपमा संचालन गरेका शैक्षिक क्रियाकलापहरुलाई समेत रोक्न पालिकाले निर्देशन दिएको हो । आज सो गाउँपालिकाका शिक्षा अधिकृत धनध्वज लामाको हस्ताक्षरमा जारी सूचनामा दोरम्बा गाउँपालिका अन्तर्गत संचालित सम्पूर्ण सामुदायिक तथा संस्थागत विद्यालयहरुले अर्को सूचना जारी नभएसम्मका लागि वैकल्पिक प्रणालीमार्फत् गरिने सिकाई सहजीकरणका सम्पूर्ण क्रियाकलापहरु स्थगित गर्नु गराउनु हुन सबैमा जानकारीका साथ अनुरोध गरेको छ ।
साथै नेपाल सरकारका निर्देशनहरु, जनस्वास्थ्य र सुरक्षाका मापदण्ड पालना हुने गरी विद्यालयका तपसिलका कार्यहरु भने सम्पादन गर्नु गराउनु हुन निर्देशन दिएको छ ।
साथै, गाउँपालिकाले रामेछाप जिल्लाभन्दा बाहिर जिल्लाबाट विद्यालयमा फर्केका शिक्षकहरुलाई १५ दिनसम्म सेल्फ क्वारेन्टिनमा बस्न लगाउने र सोको व्यवस्थापन गर्ने गराउने बारेमा समेत प्रष्ट निर्देशन दिएको छ । हरेक विद्यालयहरुका शिक्षकलाई नियमित रुपमा विद्यालयमा उपस्थित भई विद्यालयका अन्तारिक कार्यहरु सावधानीपूर्वक गर्नको लागि यो सूचना बाधक नहुने भन्दै गाउँपालिकामा बुझाउने पर्ने विद्यालयका कागजातहरु भने समयमा नै पेश गर्न सूचनाको निर्देशनमा उल्लेख छ ।
