३ असोज, काठमाडौं ।
आज छैटौं संविधान दिवस मनाइँदै छ । यस वर्ष सरकारले घरमै बसेर राष्ट्रिय झण्डा फहराउँदै संविधान दिवस मनाउन सबै नेपालीलाई आह्वान गरेको छ ।
कोरना संक्रमणको जोखिमका कारण सीमित सहभागीतामा संविधान दिवस मनाउँन लागिएको हो ।अघिल्ला वर्षहरुमा मन्त्री, सांसद, कलाकार, लगाएतको सहभागिता हुन्थ्यो भने यो वर्ष यस समारोहमा समावेश गरिएको छैन ।
२०७२ असोज ३ गते संविधान सभाबाट संघीयता सहितको ‘नेपालको संविधान’ जारी भएको दिनको स्मरण गर्दै संविधान दिवसलाई राष्ट्रिय दिवसको रुपमा मनाउने गरिएको हो ।
दिवसको अवसरमा सैनिक मञ्च टुँडिखेलमा संक्षिप्त विशेष समारोह आयोजना हुँदै छ । सो विशेष समारोहमा राष्ट्रपति भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रधानन्यायाधीश चोलेन्द्रशमशेर राणा, प्रतिनिधि सभाका सभामुख अग्निप्रसाद सापकोटा र राष्ट्रिय सभाका अध्यक्ष गणेशप्रसाद तिमिल्सिना मात्रै सहभागी हुने बताइएको छ ।
सो विशेष समारोहबाट प्रधानमन्त्री ओलीले संविधान दिवसको शुभकामना सन्देशसहित देशवासीका नाममा सम्बोधन गर्ने प्रधानमन्त्रीका पे्रस सल्लाहकार सूर्य थापाले जानकारी दिएका छन् ।
