कार्तिक २६, रामेछाप ।
चाडपर्वको मुखमा जिल्ला प्रशासन कार्यालय रामेछापको अगुवाईमा भएको बजार अनुगमनले मन्थलीमा निकै तिव्रता पाएको छ । सोमबार मन्थली बजारमा रहेका विभिन्न खाद्यान्न, तरकारी, फलफूल, कस्मेटिक र हार्डवेयर लगायतका पसलहरुमा जाँच गर्दा धेरै परिमाणमा म्याद नाघेका सामग्रीहरुको बरामद भएको छ । जिल्ला प्रशासन कार्यालय, मन्थली नगरपालिका, घरेलु तथा साना उद्योग कार्यालय, प्रहरी तथा पत्रकार लगायतको उपस्थितिमा भएको बजार अनुगमनमा विभिन्न ३३ वटा पसलहरुमा जाँच गर्दा ४२ प्रकारका विभिन्न सामग्रीहरुको बरामद भएको छ ।
अनुगमन टोलीले अनुगमनको क्रममा अनुराग इन्टरप्राइजेजबाट म्याद नाघेका विभिन्न ४ प्रकारका कस्मेटिक सामग्रीहरु बरामद गरेको छ । जसमा इन्च्यान्टर लोशन १४, क्लिनिक प्लस स्याम्पु ४ र बोरो निम पाउडर १४ वटा बरामद गरिएको छ । त्यस्तै शिव स्टोर एण्ड सप्लायर्सबाट मसला धुलो ३ प्याकेट, मिट मसला ६ प्याकेट र पोट्याटो चिप्स १ वटा गरी कूल १० प्रकारका सामग्री बरामद गरिएको हो ।
त्यस्तै समिरा इन्टरप्राइजेजबाट विभिन्न ५ प्रकारका म्याद नाघेका सामग्रीहरुको बरामद भएको छ । जहाँबाट प्राकृतिक स्याम्पु ३, सनसिल्क स्याम्पु १, केराटिन ट्रिटमेन्ट क्रिम ३, इन्च्यान्टर लोशन १ र हिमालय फेसवास ४ वटा बरामद गरिएको छ भने आयुष एण्ड आरभ सप्लायर्सबाट बडी लोशन २५ पिस, पपया कृम ५ पिस, ह्याण्डसम कृम ३ पिस साबुन १४ पिस र निम साबुन १ पिस गरी ४७ पिस बरामद गरिएको छ ।
त्यस्तै दाश जेनेरल स्टोर्स एण्ड सप्लायर्सबाट क्लिजङ् मिल्क १, फाउन्डेशन १८, स्याम्पु १, सेट वेट १, फेसवास १ पिस र मुलतानी मट्टी २ वटा बरामद गरिएको छ भने मा जाल्पा इन्टरप्राइजेजबाट पनि म्यादै नाघेका फेयर एण्ड लभ्ली ७, पोण्ड्स् क्रिम १, पोण्ड्स् पाउडर १, प्रोस्टाइल १ र लिपगार्ड ६ वटा बरामद गरिएको छ ।
मन्थलीको निकै चर्चित र ठूलो हार्डवेयर पसलबाट इनामेल १ लिटरको ३ बट्टा, डिप वरेन्ज १ लिटरको २ बट्टा, डिप ग्रीन १ लिटरको २ बट्टा, लिफ् ब्राउन ५ सय एमएलको ३२ बट्टा, स्मार्ट इनामेल १ लिटरको ३ बट्टा, एपोलो ब्लाक जापान ४ लिटरको २ बट्टा बरामद गरिएको छ । त्यस्तै कोपिला किराना पसलबाट ट्याङ् जुश २ प्याकेट, विग क्रन्ची ५३ प्याकेट र पाउँ अचार २२ प्याकेट गरी कूल ७७ प्याकेट म्याद नाघेका सामग्री बरामद गरिएको छ ।
तामाकोसी अस्पताल नजिकै रहेको दर्ता बिना संचालन भइरहेको पसलबाट डिउ ६ सय मिलिलिटरको ११ बोतल बरामद गर्नुको साथै बिस्कुट १ प्याकेट र १ लिटरवाला जुश १ बोतल कन्चन फलफूल तथा तरकारी पसलबाट बरामद गरिएको छ ।
घरेलु तथा साना उद्योग कार्यालय प्रमुख मेघराज गौतमले पठाएको प्रतिवेदनमा हाल मन्थली बजारमा कालो बजरी, मूल्यवृद्धि नभएको जनाइएको छ । साथै अनुगमनको क्रममा व्यवसायीहरुलाई कालोबजारी र मूल्यवृद्धि जस्ता क्रियाकलापहरु नगर्न निर्देशन समेत दिइएको थियो । दर्ता बिना संचालन भएका पसलहरुलाई ७ दिन भित्र मन्थली नगरपालिका वा घरेलु तथा साना उद्योग कार्यालयमा दर्ता गराउनसमेत निर्देशन दिइएको छ । हाल मन्थली बजारमा कुनै पनि खाद्यान्नको अभाव नरहेको समेत बजार अनुगमन प्रतिवेदनमा उल्लेख गरिएको छ ।
