सन्तोष ढुङ्गेल । जेठ १३।
अमेरिकी संस्था डाँफे फाउन्डेसनले रामेछाप जिल्लाको तामाकोसी अस्पताललाई तीन थान इलेक्ट्रोनिक अक्सिजन कन्सनटेरर्स सहयोग गरेको छ । कोभिड –१९ का कारण विश्वमा महामारी फैलिए सगै संक्रमितले अक्सिजन अभावमा ज्यान गुमाइ रहेको अबस्थामा सो
संस्थाले अस्पताललाई उक्त सामाग्री सहयोग गरेको हो ।
डाँफे फाउन्डेसनका तर्फबाट डाक्टर दिपेन कडरियाले आफ्ना प्रतिनिधि पराग खड्का मार्फत सो सामाग्री तामाकोसी अस्पतालका निर्देशक डाक्टर सुमन कर्मचार्यलाई हस्तान्तरण गरेका हुन् । ग्रामीण क्षेत्रमा बिरामीहरु अक्सिजनको अभावमा ज्यान गुमाउनु नपरोस् भनेर आफुले उक्त सामग्री सहयोग गरेको डाक्टर कडरियाको भनाइ छ । अक्सिजन कन्सनटेटर्स विद्युतद्वारा संचालन हुने भएकाले अक्सिजन सिलिन्डरको झन्झट नहुने अस्पतालले जनाएको छ ।
फाउन्डेसनद्वारा प्रदान गरिएको इलेक्ट्रोनिक अक्सिजन कन्सनटेटर्स आजैबाट प्रयोगमा ल्याइएको तामाकोसी अस्पतालका निर्देशक डाक्टर सुमन कर्मचार्यले जानकारी दिएका छन् । अक्सिजन कन्सनटेटर्स मार्फत रामेछापका नागरिकले तामाकोसी अस्पतालमा सहजै अक्सिजन सहितको उपचार पाउने पनि कर्मचार्यले बताए । यसअघि तामाकोसी अस्पतालले अक्सिजन सिलिन्डर प्रयोग गरिरहेको भए पनि बिरामीहरुको लागि अक्सिजन झन सहज हुने भएको छ । यस्तो संकटको समयमा मानिसको प्राण प्रदान गर्ने अक्सिजन मेसिन उपलब्ध गराएको भन्दै डाक्टर कर्मचार्यले डाफे फाउन्डेसन र दाता डाक्टर दिपेन कडरियालाई धन्यवाद ब्यक्त गरेका छन् ।
