रामेछाप । युवा तथा खेलकुद मन्त्री महेश्वरजंग गहतराजले युवालाई आफ्नै देशमा बस्ने सङ्कल्प गराउने गरी उद्यमशील कार्यक्रम सुरु गर्न लागिएको बताए । प्रेस सेन्टर रामेछापले मन्थलीमा आयोजना गरेको पत्रकार भेटघाट कार्यक्रमका बोल्दै मन्त्री गहतराजले यस वर्ष नै ३५ हजार युवालाई स्वरोजगार बनाउने बताए । युवालाई रोजगार भन्दा पनि स्वरोजगार कसरी बनाउने भन्नेमा सरकार लक्षित रहेको उनले बताए ।
नेपाली खेलाडीले कमजोर मनोबलको कारणले नभई कमजोर व्यवस्थापनको कारण खेल हार्ने गरेको उनले थपे । हामीले प्रतियोगिता हुँदा मात्रै खेलाडीलाई बोलाउछौँ, अरुबेला कुनै मतलब गर्दैनौ । जसको परिणाम हामीले हार व्यहोर्नु परेको छ । खेलाडीलाई नियमित प्रशिक्षणको व्यवस्था नहुँदा राम्रो खेल्न सकेका छैनन्- मन्त्री गहतराजले भने ।
नवौँ राष्ट्रिय खेलकुद फागुन महिनामा नै सम्पन्न गर्ने उनले बताए । आउने वर्ष निर्वाचनको वर्ष भएकोले पनि यसै वर्ष राष्ट्रिय खेलकुद सम्पन्न गर्नुपर्ने उनको तर्क छ ।उनका अनुसार नवौँ राष्ट्रिय खेलकुद प्रतियोगिता पोखरामा हुनेछ ।
