रामेछाप । रामेछाप जिल्लाको रामेछाप नगरपालिका– ८ मा रहेको श्री शारदा संस्कृत माध्यमिक विद्यालयले संस्कृत भाषा अन्तर्गत कर्मकाण्ड पढ्नेलाई निःशुल्क खाने, बस्ने व्यवस्थासहित पढाउने भएको छ । जिल्लाको एक मात्र संस्कृत विद्यालय श्री शारदा संस्कृति माध्यमिक विद्यालयले संस्कृत भाषा अन्तर्गत निःशुल्क कर्मकाण्ड पढाउने भएको हो । उक्त विषय लिएर पढ्न चाहने विद्यार्थीहरुलाई खाने, बस्ने व्यवस्थासहित निःशुल्क कर्मकाण्ड पढाइने उक्त विद्यालयका विद्यालय व्यवस्थापन समितिका अध्यक्ष शिवप्रसाद घिमिरेले जानकारी दिए ।
पछिल्लो समय पुरोहित पेशा र संस्कृत भाषा लोप हुने अवस्थामा पुगेकाले यसको संरक्षणका लागि रामेछापमै पहिलो पटक निःशुल्क कर्मकाण्ड पढाउन थालिएको वि.व्य.स अध्यक्ष घिमिरेले बताएका छन् । अहिले रामेछाप र दोलखाका १० जना विद्यार्थीहरु कर्मकाण्ड पढिरहेका छन् । कक्षा ८ देखि १२ सम्मका विद्यार्थीहरुले कर्मकाण्ड अध्ययन गरिरहेको अध्यक्ष घिमिरेले जानकारी दिए ।
अन्य विभिन्न जिल्लाका कर्मकाण्ड पढ्न ईच्छुक विद्यार्थीहरुलाई समेत खाने, बस्ने व्यवस्था गरी पढाइने वि.व्य.स अध्यक्ष घिमिरेले बताए । कर्मकाण्ड अन्तर्गत रुद्री, चण्डी, वेद, भागवत पढाइने उनका भनाइ छ । निःशुल्क कर्मकाण्ड पढाउनका लागि आवश्यक पर्ने रकम व्यवस्थापन गर्ने काम भइरहेको विद्यालयले जनाएको छ । स्थानीय तह, विभिन्न संघसंस्था तथा व्यक्तिहरुले सकेको सहयोग प्रदान गरेर पुरोहित पेशा र संस्कृत भाषा लोप हुनबाट जोगाउन विव्यस अध्यक्ष घिमिरेले आग्रह गर्नुभयो ।
संस्कृत विद्यालयमा निःशुल्क खाने, बस्ने व्यवस्थासहित पठनपाठन
Leave a Reply
