प्रधानमन्त्री तथा काँग्रेस सभापति शेरबहादुर देउवाले पार्टीमा एकलौटी निर्णय गर्न खोजेको भन्दै शेखर कोइराला पक्ष असन्तुष्ट बनेका छन् ।स्थानीय तहको निर्वाचन वैशाखमै हुनुपर्ने समेत कोईराला समूहले बताएको छ । निर्वाचनको मितिका विषयमा देउवाले पार्टीमा कुनै छलफल नगरेको भन्दै सोमबार बसेको कोईराला पक्षको भर्चुअल बैठकमा नेताहरुले आक्रोश पोखेका थिए ।
स्थानीय तहको निर्वाचनका बारेमा गठबन्धन सँग निर्णयमा पुग्नुअघि सभापति देउवाले आफ्नो पार्टीमा छलफल गर्नुपर्ने आवाज उठेको नेता अर्जुन नरसिंह केसीले जानकारी दिए । कोइराला पक्षको बैठकमा तीनै तहको निर्वाचनमा काँग्रेस एक्लै चुनावी मैदानमा उत्रिनु पर्नेबारे छलफल भएको बताइएको छ ।
बैठकमा शेखर कोइरालासहित महामन्त्री गगन थापा, नेताहरु डा. मिनेन्द्र रिजाल, चन्द्र भण्डारी, अर्जुननरसिंह केसी, डा. रामशरण महतलगायतका नेताको सहभागिता रहेको थियो ।
