रामेछाप । शिक्षा हासिल गर्ने इच्छालाई कसैले पनि रोक्न सक्दैन। लिखुतामाकोशी गाउँपालिका बिजुलिकोटका ६६ वर्षीय मोहनबहादुर महतको इच्छालाई पनि न उनको उमेरले रोक्न सक्यो न परिस्थितिले । वृद्धावस्थामा पनि कक्षा ७ मा भर्ना भएर महतले शिक्षा हासिल गर्ने इच्छालाई जोशिलो बनाए ।
अचेल मोहनबहादुर महत र उनकी श्रीमती रामकुमारी कार्की महत पुस्तक बोकेर सँगसँगै विद्यालय जान्छन् । महत जोडी सँगै उनिहरूका २ छोरी अनिषा र मनिषा पनि विद्यालय जान्छन् । सामान्य किराना पसल तथा कृषि पेशाले जीवनको गुजारा गर्दै आएका मोहनबहादुरलाई यतिबेला पढ्न जाने जोश बढेको छ ।ईसिडिमा पढ्ने र कक्षा २ मा पढ्ने सानी छोरीहरूलाई डोहोर्याउँदै लिखुतामाकोशी गाउँपालिका वडा नं. ४ बिजुलिकोटमा रहेको भृङ्गेश्वर माध्यमिक विद्यालय धारापानी पुग्छन महत दम्पती ।
मोहनबहादुर र रामकुमारी जस्तै जानुका महत र बैकुण्ठ महतका दम्पती र धनबहादुर र प्रमिला महतका दम्पती पनि सँग सँगै विद्यालय जान्छन् । बालापनमा विविध कारण पढ्न नसकेको गुनासो पोख्छन् मोहनबहादुर । उनि भन्छन् – पढ्न त धेरै मन थियो बालखा हुँदा तर पढ्न सकिएन । अब यो उमेर भए पनि पढ्न मन लाग्यो । पढाई विना केहि नहुने रहेछ भनेर यो उमेरमा बुझियो ।
महत दम्पती जस्तै महिला स्वयमसेविकाहरू पनि विद्यालयमा भर्ना भएका छन् । नेपाल सरकारले महिला स्वयमसेविकाको शैक्षिक योग्यता कक्षा ८ पास अनिवार्य गरे सँगै महिला स्वयमसेविका जानुका महत र पार्वती महत पनि विद्यालय भर्ना भएका हुन् । सँधै सानो छोरो लिएर विद्यालय आउने र दिनभरि छोरो कुरेर बस्ने निर्मला तामाङ पनि छोरो पढ्ने विद्यालयमै भर्ना भए ।
महत दम्पती जस्तै अरु पनि विद्यालय भर्ना भएको भृङ्गेश्वर माध्यमिक विद्यालय धारापानीका प्रधानाध्यापक केवलबहादुर तिमल्सेना बताउँछन् ।उनका अनुसार अन्य १२ जना विद्यालयमा भर्ना भएका छन । बढ्दो उमेरमा पनि आफ्नो बालबच्चा सँगै पढ्न भर्ना भएका अभिभावकहरूको जोश देखेर प्रधानाध्यापक तिमल्सेना पनि मख्ख छन् । तिमल्सेनाका अनुसार, ६६ वर्षिय मोहनबहादुर बस्नेत कक्षा ७ मा भर्ना भएका छन भने ५० वर्षकी उनकी श्रिमती रामकुमारी महत कक्षा ३ मा भर्ना भएकी छिन् ।
विद्यालयमा पढ्न ४१ वर्षकी जानुका महत कक्षा ३ मा, ४१ वर्षकै प्रमिला महत कक्षा, ४५ वर्षकी मिथुला महत कक्षा ७ मा, ४० वर्षकी पार्वती महत कक्षा ७ मा, ४५ वर्षका धनबहादुर महत कक्षा ८ मा, ४४ वर्षका बैकुन्ठ महत कक्षा ८ मा, ३२ वर्षकी लोकुमाया श्रेष्ठ ७ मा, २८ वर्षकी निर्मला तामाङ कक्षा ९ मा र ४४ वर्षकी सुकुमाया महत कक्षा ७ मा भर्ना भएका छन् ।
भृङ्गेश्वर माध्यमिक विद्यालय धारापानीको भर्ना अभियानका कारण आफू केहि हद सम्म सफल भएको प्राधानाध्यापक तिमल्सेना बताउँछन् । विद्यार्थीका आमाबाबु नै विद्यालयमा पढ्न आउँदा विद्यार्थी व्यवस्थापनमा सहज हुने समेत तिमल्सेना बताउँछन् । उनि भन्छन – अभिभावक नै विद्यार्थी बनेर आए पछि पढाइको गुणस्तरको समेत निग्रानी हुनाले विद्यालयको पढाईको नजिता अब्बबल आउँनुका साथै विद्यालय व्यवस्थापन समितिमा पनि पढेबुझेका अभिभावक आउनाले शैक्षिक सुधारमा उल्लेखनिय योगदान पुग्ने देखिन्छ ।
पढ्ने उमेरलाई उमेरले र विधि पद्धतिले नछेक्ने कुरा लिखुतामाकोशी गाउँपालिकाका अध्यक्ष केशव महत बताउँछन् । उनि भन्छन् – बृद्धा अवस्थामा समेत पठनपाठनका लागि विद्यालय भर्ना हुनु भएकाहरूलाई पालिकाले स्वागत गर्छ । यो बिद्यालय भर्ना चर्चाका लागि मात्रै नभई पढ्नकै लागि होस ।
