रामेछाप । मन्थली नगरपालिकाले एक वडा एक प्रतीक्षालय निर्माण गर्ने कार्यको थालनी गरेको छ । पैदल यात्रीलाई आवत-जावत गर्न सहज होस भन्ने लक्ष्यका साथ नगरपालिकाले एक वडा एक प्रतीक्षालय अवधारणा कार्यक्रम अघि बढाएको हो । रामेछापको मन्थली वडा नं १ ट्राफिक चोकमा नगरपालिकाले प्रतीक्षालय निर्माण गरेको छ । यो प्रतीक्षालय निर्माण भएपछि यो ठाउँबाट अन्यत्र जान, बस कुर्न र पैदल हिँड्ने यात्रुहरूलाई विश्राम लिन सहज भएको छ । यो प्रतीक्षालय नगरपालिकाले नगरको एक वडा एक प्रतीक्षालय अवधारणा अन्तरगत पाँच लाख रुपैयाँ लागतमा निर्माण गरेको हो ।
नगरपालिकाको एक वडा एक प्रतीक्षालय बनाउने अवधारणा अन्तर्गत १४ वटै वडामा प्रतीक्षालय निर्माण भएको नगरपालिकाको पूर्वाधार विकास तथा अनुगमन शाखाका इन्जिनियर डिल्ली बहादुर अधिकारीले बताए। नगरपालिकाको सबै वडाको वडा केन्द्र, बजार केन्द्र, मानिसहरू जमघट हुने स्थान र मानिसहरू बस चढ्ने वा झर्ने स्थानहरूको छनोट गरी प्रतीक्षालय निर्माण गरिएको उनको भनाइ छ । उनका अनुसार- मन्थली नगरपालिकाको वडा नं १ ट्राफिक चोकमा पाँच लाख रुपैयाँ लागमा प्रतीक्षालय बनाइएको र अरू वडामा दुई-दुई लाख रुपैयाँ लागतमा प्रतीक्षालय निर्माण गरिएको छ । मन्थलीको ट्राफिक चोकमा निर्माण भएको अन्य वडाको भन्दा विशेष खालको भएकाले लागत पनि बढी छ ।
