काम नहुँदा कुनै समस्या नहुने निर्माण व्यवसायी महासंघका केन्द्रीय अध्यक्ष रवि सिंहले बताएका छन् । रामेछाप जिल्ला निर्माण व्यवसायी संघ को १४ औ साधारण सभालाई सम्बोधन गर्दै केन्द्रीय अध्यक्ष सिंहले भने – बरु काम नहुँदा कुनै समस्या हुँदैन तर अति घटीमा टेन्डर पारेर काम लिँदा सही तरिकाले काम गर्न सकिँदैन । लिएको काम गर्न नसक्दा गाली बेईजती सबै सहनु पर्छ र आफ्नो छवि समेत गुमाउनु पर्छ । तसर्थ बरु कामै नलिनुस्, लिनुहुन्छ भने पनि सही मूल्यमा लिनुहोस् ।
राजस्व नउठ्दा निर्माण व्यवसायीलाई पनि समस्या परेको समेत अध्यक्ष सिंहले बताए । उनले भने – राजस्व नउठ्दा हामीले भुक्तानी पाएका छैनाँै । नयाँ टेन्डर छैन । कामको अभाव छ । लिएको काम समेत समयमा पुरा गर्न सकेका छैनौँ ।
१४ औँ साधारण सभामा संघका जिल्ला महासचिव राम कुमार पाण्डेले १३ औँ साधारण सभा पछि गरेको कामहरूको समेत जानकारी गराएका थिए । संघले E–GP Training मार्फत निर्माण व्यवसायी तथा व्यवसायीका प्रतिनिधिहरू लाई अनलाइन बोलपत्र दर्ता गर्न सक्षम बनाएको । निर्माण व्यवसायी तथा व्यवसायीका प्रतिनिधिहरूलाईConstruction Management Training दिलाउन सहजिकरण गरेको, महासंघको आयोजनामा म्याद थप, बाँकी रकम भुक्तानी उपभोक्ता समिति मार्फत हुने, निर्माण कार्यको नियम खारेजी लगायत विविध ९ बुँदे माग राखी घोषणा गरेको आन्दोलनका कार्यक्रमहरूमा जिल्ला प्रशासन कार्यालयमा धर्ना गरेको, सार्वजनिक खरिद अनुगमनको कार्यालय ताहाचलमा धर्ना, सेफ्टी हेलमेट र ज्याकेट लगाई सम्माननीय प्रधानमन्त्रीज्यूको निजी निवास बालुवाटारमा निर्माण उपकरण सहित धर्ना बसेको, संसद भवन बानेश्वर र माइतीघर मण्डलामा सेफ्टी हेलमेट ज्याकेट लगाई कालोपट्टि बाँधेर सिट्ठी जुलुस, धर्ना र कोणसभा, सिँचाई विभाग र सडक विभागको कार्यालयमा तालाबन्दी धर्ना बसेको लगायतका कार्यक्रम गरेको प्रगति विवरणमा वितरण गरेको थियो ।
संघका अध्यक्ष बलराम श्रेष्ठले आफू निर्माण व्यवसायीको हकहितका लागि सदैव लागि पर्ने बताएका छन् । उनले भने – निर्माण व्यवसायीको हकहितका लागि म सदैव खट्नेछु । संघको भवन निर्माणका लागि पनि लागि पर्नेछु ।
