काठमाडौँ । नेपाली काँग्रेस रामेछाप– काठमाडौँ सम्पर्क समितिका सभापति राजनारायण श्रेष्ठको अन्तेष्टी बिहीबार पशुपति आर्यघाट गरिएको छ । नेपाली काँग्रेसका सभापति शेर बहादुर देउवा, महामन्त्री द्वोय गगन थापा , विश्वप्रकाश शर्मा , पूर्व उपसभापति गोपालमान श्रेष्ठ , पूर्व महामन्त्री डा. शशाङ्क कोइराला , केन्द्रीय सदस्यहरू प्रदीप पौडेल, मीन विश्वकर्मा , नानु बास्तोला लगायतले पार्टीको झन्डा ओढाएर अन्तिम श्रद्धाञ्जली व्यक्त गरे ।
नेकपा एमाले, माओवादी केन्द्र लगायत दलका तहका शीर्ष नेताहरू एवं रामेछापका नेता तथा कार्यकर्ताहरूको लहर श्रेष्ठको अन्तिम बिदाइमा सहभागी थिए । श्रेष्ठको मंगलबार राती काठमाडौँमा हृदयाघातबाट निधन भएको थियो । श्रेष्ठ आफैले संचालन गर्दै आएको होटेलमा मंगलबार राती करिब ८ः३० बजे हृदयाघात भएको र उपचारको लागि किस्ट मेडिकल कलेज तथा शिक्षण अस्पतालमा निधन भएको थियो ।
राजनारायण श्रेष्ठको निधनले रामेछाप जिल्ला र नेपाली काँग्रेसलाई अपूरणीय क्षति पुगेको र जिल्लाले एक महत्त्वपूर्ण समाजसेवी एवम् असल राजनीतिक अभिभावक गुमाएको नेपाली काँग्रेस रामेछापका सचिव विनोद कार्कीले बताए।
नेपाल विद्यार्थी संघबाट काँग्रेसको राजनीतिमा प्रवेश गरेका श्रेष्ठ दुई पटक नेपाली काँग्रेस जिल्ला कार्य समिति रामेछापको सदस्यमा निर्वाचित भएका थिए । नेपाली काँग्रेस रामेछापको १४ औँ जिल्ला अधिवेशनमा महाधिवेशन प्रतिनिधिमा चुनाव लडेका श्रेष्ठ गएको स्थानीय तहको निर्वाचनमा नेपाली काँग्रेसबाटै खाँडादेवी गाउँपालिका वडा नं ५ मा पनि वडाध्यक्षमा चुनाव लडेका थिए । तर उनी निर्वाचित हुन सकेका थिएनन् ।
२०५६÷५७ साल देखि नै होटेल व्यवसायमा लागेका श्रेष्ठ फास्ट फुड एसोसिएसन नेपालको पूर्व महासचिव एवं हालका सल्लाहकार समेत रहेका थिए । श्रेष्ठको परिवारमा श्रीमती, ४ छोरी र एक छोरा छन् ।
