रामेछाप नगरपालिकाले सक्यो १४ औँ हिउँदे नगर सभा

रामेछाप । रामेछाप नगरपालिकाले १४ औँ हिउँदे नगर सभा बुधवार सम्पन्न गरेको छ । रामेछाप नगपालिका वडा नं. ८ सामुदायिक भवन भँगेरीमा सम्पन्न सभा नगर प्रमुख लवश्री न्यौपानेको अध्यक्षतामा सम्पन्न भएको थियो ।
शिक्षा, स्वास्थ्य, कृषि, खानेपानी , पर्यटन र पूर्वाधार समुन्नत र समृद्ध रामेछाप निर्माण आधार भन्ने मूल नारालाई आत्मसाथ गर्दै अगाडी बढेको नगरपालिकाले आगामी आर्थिक वर्ष २०८१÷०८२ मा माग गरिने योजना तथा कार्यक्रमहरूका सम्बन्धमा सभामा छलफल भएको थियो । छलफलमा सडक पूर्वाधार तर्फ १४ वटा , सिँचाइ तर्फ ८ वटा , खानेपानी तर्फ ५ वटा, खेलकुद तर्फ ४ वटा, धार्मिक स्थल र मठमन्दिर तर्फ ८ वटा र विविध तर्फ ४ वटा योजनाहरू बारे छलफल भएको थियो ।
नगरपालिकाको विनियोजन ऐन २०८० लाई संशोधन गर्ने सम्बन्धमा बनेको विधेयक २०८० को मस्यौदा माथि सभामा छलफल भई पारित गरेको छ । चालु आ.व.०८०÷८१ को हाल सम्म नगर कार्यपालिकाको बैठकमा भएका निर्णयहरू सभामा छलफल भई सभाले अनुमोदन गरेको थियो ।
सभामा विगतमा रकम विनियोजन भई अधुरा रहेका क्रमागत योजनाहरू सङ्घीय सरकार तर्फका १३ वटा र प्रदेश सरकार तर्फका १८ वटा योजनाहरू आगामी कार्यक्रममा योजनाहरू समावेश गर्न सङ्घीय र प्रदेश सरकार समक्ष माग गर्ने सभाबाट पारित गरिएको थियो ।
नगरपालिकाको चालु आ. व.२०८०÷०८१ मा संशोधन गरी संचालन गर्नु पर्ने योजना तथा कार्यक्रमहरू नगर उप प्रमुख बाला कुमारी कार्कीले सभामा प्रस्तुत गरेकी थिइन् । सभाका सचिव मित्रप्रसाद घिमिरेले सभामा उठेका आफ्ना अधिकार क्षेत्र भित्रका सवालका ओजपूर्ण जवाफ दिएका थिए ।