रामेछाप । जिल्लाको सुनापति गाउँपालिकाले सामुदायिक मेलमिलापकर्ताहरूका लागी पुनर्ताजगी तालिम संचालन गरेको छ । गाउँपालिकाको न्यायिक समितिले वडा स्तरका मेलमिलापकर्ताहरूलाई माघ ५,६ र ७ गते पुनर्ताजगी तालिम दिएको हो ।
गाउँपालिकाकी कानुनी सहजकर्ता प्रतिमा मोक्तानका अनुसार मेलमिलापकर्ताको रूपमा काम गरिरहेका २५ जनालाई तालिम दिएको हो । उनले भनिन् – स्थानीय स्तरका विवादहरू स्थानीय स्तरमै मेलमिलापका माध्यमबाट समाधान गर्न मेलमिलाप कर्ताहरूले आफ्नो भूमिका राम्रोसँग निर्वाह गर्नुभएको छ ।
काम गर्ने क्रममा देखिएका समस्या समाधानको उपाय खोज्न पुनर्ताजगी तालिम दिइएको गाउँपालिकाकी उपाध्यक्ष गीता विष्ट चौलागाईँले बताइन् । उनले भनिन – विवाद समाधानमा मेलमिलापकर्ताको भूमिका महत्त्वपूर्ण हुन्छ । मेलमिलापकर्ताको कारण स्थानिय स्तरका विवाद समाधान भएको छ । मेलमिलापकर्ताको क्षमता विकासको लागि पालिकाले तालिमको आवश्यकता महसुस गरेरै यो तालिम राखिएको हो । यो पुनर्ताजगी तालिमले मेलमिलापकर्ताको अपेक्षा अनुरूप राखिएको हो । यो तालिमले उहाँहरूको कार्यक्षमता अझ बढेको छ ।
मेलमिलाप मार्फत विवादहरूको स्थानीय स्तरमै समाधान खोज्न पुनर्ताजगी तालिमले सक्रियता अझै बढाउन मद्दत पुगेको सहभागीहरूको भनाइ छ ।
तालिमको सहजिकरण अधिवक्ता पाण्डव प्रसाईँ र मानवअधिकारकर्मी नवराज पथिकले गरेका थिए ।
पुनर्ताजगी तालिमले मेलमिलाप कर्ताको भूमिकालाई अझै प्रभावकारी बनाउँदै उनीहरूको सक्रियता बढाउन मद्दत गर्ने अपेक्षा गाउँपालिकाको छ ।
मेलमिलापकर्ताहरूका लागी सुनापतिमा पुनर्ताजगी तालिम
