रामेछाप । लिखु खोलाले जलाउँदै गरेको लास बगाएको छ । लिखु–२ जल विद्युत् आयोजनाले बिना सूचना एकै पटक ड्याम खोल्दा जलाउँदै गरेको लास बगाएको हो । केही मलामी समेत सम्पर्क विहीन छन् ।
रामेछापको उमाकुण्ड गाउँपालिका १ गुम्देल बाल्दिङ मा पर्ने लिखु नदीमा बिहीबार आत्महत्या गरेर ज्यान गुमाएका बाल्दिङका ३२ वर्षीय झपट थापा (विदुर) को शव जलाउने क्रममा जलविद्युत आयोजनाले ड्याम खोलिदिएपछि लास बगाएको स्थानीय राजेन्द्र बस्नेतले बताए । बस्नेतका अनुसार पोष्टमार्टम पछि शव लिएर गएका मलामीहरू पनि केही सम्पर्कमा आएका छैनन।
स्थानीय बस्नेतले भने – ५०-६० जनामलामीहरू त्यहाँ पुगेका थियौँ । साथीहरू सबै हराए, को–को के–के भए थाहा भएन । करिब ६ बजे तिर एक्कासि खोला आयो हामी भागेर माथि आयौँ । जल्दै गरेको शव बगायो । हामी साथीहरूको खोजीमा छौँ ।
त्यस्तै घटना बारे किन्जा प्रहरी चौकीका प्रहरीलाई बुझ्दै आफूहरू घटना स्थल तर्फ जाँदै गरेको बताए ।
