रामेछाप । नेपाल विद्यार्थी संघ रामेछापले जिल्ला प्रशासन कार्यालयमा ज्ञापन पत्र बुझाएको छ । संघका अध्यक्ष बिनोद बुढाथोकी सहित गएको टोलिले प्रमुख जिल्ला अधिकारी अनिता निरौलालाई ज्ञापन पत्र बुझाएको हो । जिल्लाको मुख्य प्रशासकीय क्षेत्रमा निषेधित क्षेत्र तोकेपछि संघले त्यसको विरोध जनाएको हो । संघले २४ घण्टा भित्र प्रशासनको उक्त आदेश फिर्ता नलिए निषेधाज्ञाको आदेश तोड्दै थप आन्दोलनका कार्यक्रम गर्ने सम्मको चेतावनी समेत दिएको छ । प्रशासनको अनावश्यक चलखेल हस्तक्षेप नसहने र नागरिकको स्वतन्त्रता र निर्वाध रुपमा हिड्न, डुल्न, भेला हुन, कार्यक्रम गर्न पाउने संवैधानिक अधिकार माथि कुण्ठित गर्नु भनेको लोकतन्त्रको उपहास भएको ज्ञापन पत्रमा उल्लेख छ । रामेछाप जिल्लामा कुनै त्यस्तो हुल हुज्जात र अशान्ति फैलने कुनै पनि कार्य नभएकोले उत्त आदेशको फिर्ता लिन संघले माग गरेको ।
सोमबार नेपाली काँग्रेस जिल्ला पार्टी सचिव दीपक खड्का सहित नेविसंघ अध्यक्ष विनोद बुढाथोकीको नेतृत्वमा प्रशासन पुगेको नेविसंघ टोलीले रामेछाप जिल्ला शान्तिपूर्ण अवस्थामा निर्वाध ढंगले चलिरहेको अवस्थामा प्रशासनले आफ्नो अधिकारको अनावश्यक प्रयोग गरि आफू निम्छरो प्रशासन भएको पुष्टि गरेको साथै सिङ्गो प्रशासनको हुर्मत लिने यो निर्णयले नेपाल सरकार, गृह प्रशासनको बेइज्जत समेत भएका ज्ञापन पत्रमा उल्लेख छ ।
जिल्ला प्रशासन कार्यालय रामेछापले माघ १४ (आइतवार) देखि २ महिना सम्मका लागू हुने गरी मन्थली बजार स्थित राष्ट्रिय वाणिज्य बैङ्क देखि जिल्ला प्रशासन कार्यालय हुँदै कृषि विकास बैङ्क जाने सडक र त्यस सडकको ५० मिटर वरपरको क्षेत्रमा ५ जना भन्दा बडीमा भेला, धर्ना, घेराउ, अनसन र विरोध प्रदर्शन गर्न नर्पाइने भनि आदेश जारी गरेको थियो ।
