रामेछाप । केही दिनदेखि जिल्ला अस्पताल रामेछापको बेड बिरामीले भरिभराउ भएको छ । ४ दिनदेखि अस्पतालमा बेड भर्ना हुने बिरामीको संख्या ह्वात्तै बढेको अस्पतालका निमित्त मेडिकल सुपरिटेन्डेन्ट डाक्टर केशव श्रेष्ठले बताए । “१५ शैयाको अस्पतालको सबै शैयाहरु बिरामीले भरिएको छ”,उनले भने । बिरामीहरू थप हुन सक्ने भएकाले केही शैया थप गरेर व्यवस्थापन मिलाइएको डा श्रेष्ठले बताए । अहिले अस्पतालमा ज्वरो,निमोनिया र दमका बिरामीहरू धेरै बढेको उनको भनाई छ । उनका अनुसार ओपिडीमा पनि दैनिक एक सयको हाराहारीमा बिरामीहरू उपचारको लागी आउने गरेका छन् ।
सरकारी स्वास्थ्य संस्थाको गुणस्तर गतिलो नहुने भन्दै उपचार र स्वास्थ्य परीक्षणका लागि निजी अस्पताल र क्लिनिकमा जाने क्रम बढ्दो छ तर जिल्ला अस्पताल रामेछापले पछिल्लो समय बिरामीको मन जित्ने गरी काम गर्न थालेको हो ।
अस्पतालले सेवाहरू थप गरेसँग बिरामी भएर काठमाडौँ जानुपर्ने बाध्यता हटेको रामेछाप नगरपालिका ७ का शिव बस्नेतले बताए । “हामी सामान्य बिरामी हुँदा पनि राजधानीको अस्पतालहरूमा जानुपर्ने बाध्यता थियो । अहिले सबै सेवा यही उपलब्ध छ,सहज रूपमा जिल्लाकै अस्पतालमा सेवा पाउँदा खुसी लागेको छ,”उनले भने ।
रामेछाप नगरपालिका ८ की शान्ति तामाङले बच्चालाई निमोनिया भएर अस्पताल भर्ना गरेकी छन् । ४ दिनदेखि आफ्नो बच्चालाई अस्पताल भर्ना गरिएको बताउँदै उनले अस्पतालका चिकित्सकहरूको राम्रो व्यवहार र गुणस्तरीय सेवाले नै अस्पताल प्रति विश्वास बढ्दै गएको बताइन् ।
पछिल्लो समय गुणस्तरीय स्वास्थ्य सेवा पाउन थाले पछि जिल्ला अस्पताल रामेछापमा सेवाग्राही बढ्न थालेका छन् । भौतिक संरचना र उपकरणका साथमा विभिन्न विशेषज्ञ सेवा पनि थप भएसँगै अस्पतालको सेवा राम्रो भइरहेको रामेछाप नगरपालिका ७ का विष्णु महताराले बताए । उनका अनुसार अस्पतालप्रति नागरिकहरूको विश्वास बढ्दै गएको छ ।
अस्पतालमा आकस्मिक प्रसूतिजन्य शल्यक्रिया सेवा सुरु भएदेखि प्रसूति सेवा लिनेको संख्या समेत बढेको छ । ३ वर्ष अघिको तुलनामा अहिले प्रसूति सेवा लिनेको संख्या दोब्बरले बढेको अस्पतालका प्रसूति रोग विशेषज्ञ डाक्टर मनोज यादवले बताए । उनले भने,“१ सय भन्दा बढी महिलाहरूको शल्यक्रिया मार्फत बच्चा जन्माइएको छ । सबै शल्यक्रियाहरू सफल भएका छन् । शल्यक्रिया गरिएका सबै आमा र बच्चाको अवस्था राम्रो छ । यो हाम्रो ठुलो सफलता हो ।”
जिल्ला अस्पताल रामेछापमा अहिले आइसियु,भेन्टिलेटर,कल्चर सेवा,जनरल ओपिडीका साथै प्रसूति शल्यक्रिया, अक्सिजनसहितको स्वास्थ्य सेवा, डाइलसिसका साथै हर्नियाँ, हाइड्रोसिल, दाँत र आँखाको उपचार सेवा, लगायतका स्वास्थ्य सेवा उपलब्ध छन् । अस्पतालले जनरल शैया समेत निःशुल्क गरेको छ । अहिले १५ शैयाको रहेको यो अस्पताललाई बाग्मती प्रदेश सरकारले ५० शैयाकोे बनाउने निर्णय समेत गरेको छ । अस्पताल ५० शैयाको हुने बित्तिकै अस्पतालले अन्य सेवाहरू थप गर्ने जनाएको छ ।
