रामेछाप । हामी धेरैलाई थाहा छ एम्बुलेन्सले बिरामी बोक्छ । तपाई हामी बिरामी हुँदा कैयौँ पटक एम्बुलेन्समा चढेर अस्पताल पनि गएका छौँ । तर रामेछापको एउटा एम्बुलेन्सले बिरामी मात्रै बोक्दैन । उक्त एम्बुलेन्सले खाद्यान्नको सामग्री बोकेको फेला परेको छ । मालवाहक सवारी साधनले बोक्नुपर्ने सामान एम्बुलेन्सले बोकेको पाइएपछि चौतर्फी आलोचना भएको छ ।
रामेछाप नगरपालिका ८ मा रहेको मालगिरी विकास केन्द्रद्वारा संचालित प्रदेश नं ३–०१–०२४ घ १७७६ नम्बरको एम्बुलेन्सले दैनिक बिरामी बोक्न छोडेर खाद्यान्न बोक्ने गरेको पाइएको हो । एक प्रत्यक्षदर्शीका अनुसार एम्बुलेन्सले दैनिक मन्थलीका विभिन्न पसलहरूबाट खाद्यान्न लोड गरेर लैजाने गरेको छ । सो एम्बुलेन्समा बिरामी कम खाद्यान्न धेरै चढ्ने गरेको उनले बताए ।
पछिल्लो पटक मन्थली भैशेश्वर स्थित श्याम स्टोरबाट एम्बुलेन्समा राखेर सामान लगेको बताउँदै स्टोरका संचालीकाले सो विषयमा थप बोल्न चाहिनन् । रामेछाप नगरपालिकाका स्वास्थ्य शाखा प्रमुख विष्णुबहादुर कार्कीले एम्बुलेन्सले खाद्यान्न बोक्न नपाउने बताए । उनले भने,“एम्बुलेन्सले बिरामी बाहेक सन्चो मान्छे समेत बोक्न पाउँदैन । एम्बुलेन्सले बिरामी बाहेक अरू केही बोक्न कानूनत गलत हो, त्यसको सम्बन्धित निकायमा खबर गरेमा तत्काल कारबाही हुन्छ ।”
रामेछापका प्रमुख जिल्ला अधिकारी अनिता निरौलाले आफूलाई उक्त विषयमा कुनै जानकारी नरहेको बताइन् । उनले यस विषयमा आफूले बुझेर अनुसन्धान गर्ने बताइन् । उनले भनिन,“एम्बुलेन्सले त्यस्तो गतिविधि गर्न पाइदैन् ।”
बिरामी बोक्ने एम्बुलेन्सले बोक्यो चामल
