रामेछाप । नेपाली काँग्रेस रामेछापले महासमिति सदस्यको टुङ्गो लगाएको छ । फागुन १ गते मतदान गर्न निर्वाचन प्रक्रिया अगाडि बढाएको काँग्रेस रामेछापले सहमतिमा नै महासमिति सदस्य चयन गरेको छ ।
नेपाली काँग्रेस रामेछापका शीर्ष नेताहरूको सहमतिबाट ध्रुवहरि ढुङ्गेल, झपडराज भण्डारी, नरबहादुर थापा मगर, केशव चालिसे, रत्न कार्की खुल्ला तर्फ महासमिति सदस्य चयन भएका छन् । त्यस्तै महेश कार्की खसआर्य, जितेन्द्र मोक्तान जनजाति, गंगा अधिकारी र विनीता खड्का खुल्ला महिला, कुमारी हायु जनजाति महिला र बलबहादुर परियार दलित कोटाबाट महासमिति सदस्य चयन भएको काँग्रेस रामेछाप सचिव दीपक खड्काले बताए । उनले भने – सहमति बाटै सदस्य चयन गर्नु सकारात्मक पक्ष भए पनि महासमिति सदस्य टुङ्ग्याउने प्रक्रिया विधि सम्मत भएन । मनोनयन दर्ता गरेका उम्मेद्वारहरुसँग छलफल नगरी अन्तिम निर्णयमा जानू गलत हो ।
सहमति र छलफलबाटै सदस्य मनोनीत गरिएको नेपाली काँग्रेस रामेछापका निवर्तमान सभापति लवश्री न्यौपानेले बताए । निर्वाचन समितिका संयोजक कुशप्रसाद दहाल भने फोनकलको कुनै प्रतिक्रिया नदिई बसेका छन् ।
निर्वाचन समिति तथा काँग्रेस रामेछापबाट भने महासमितिको विषयमा प्रस्ट धारणा आएको छैन । सामाजिक सञ्जालमा महासमिति सदस्य चुनिएकाहरूलाई उनीहरूका शुभेच्छुकहरूले बधाई तथा शुभकामना दिन थाली सकेका छन् । स्रोतका अनुसार निर्वाचन समितिले चुनिएका महासमिति सदस्यहरूलाई प्रमाणपत्र समेत हस्तान्तरण गरिसेको छ ।
